Огь, нече де насипли эдим,
Насипли эдим бу гече:
Бу гече мен герти сююп,
Герти сююп къарадым.
Сюювюмню гертилигин,
Гертилигин сезгенде,
Даимликге яралгъан деп
Яралгъан деп турадым.
Огь, нече де къыйын тийди
Къыйын тийди танг къатып,
Гёз ачгъанда сююв ёкъну
Сююв ёкъну сезмеге.
Ялгъан булан арасы ёкъ
Арасы ёкъ сюювню
Тез де табып, тас да этдим,
Тас да этдим тез неге?
Сигьру гючю болгъан экен,
Болгъан экен гьислени,
Найнай этип, тюшлер сайын,
Тюшлер сайын гелеген.
Сююв учун йыламагъан,
Йыламагъан юрекни
Йылатма не, улутуп да,
Улутуп да билеген.
Сагъынч мени тезден бувма,
Тезден бувма башлады…
Дагъы гёрмей энни нечик,
Энни нечик турайым?
Тюшде гелген аявлумну,
Аявлумну унутуп,
Тюлде нечик янгы насип,
Янгы насип къурайым?!
Ялгъан насип
© Copyright: Нурьяна Арсланова, 2018
Свидетельство о публикации №118032511034
Свидетельство о публикации №118032511034
Рецензии