Гёзюм юмуп гёз ачгъынча
Гюлдей сююв ёкъ болду.
Гюн иржайгъан ачыкъ кёгюм
Къара булутдан толду.
Сени булан сююнч гетди,
Сюймей магъа сёйлеме.
Юрегимни насип къылын
Бирев болмай кюйлеме.
Бизге багъып гел дей эдинг
Терс англамай кююнгню,
Гёрсетмеге сюе эдинг
Биз яшажакъ уьюнгню.
«Биз яшажакъ» уьйлени де
Буюрмады гёрмеге,
Сюювюмден очакъ къуруп
Сагъа насип бермеге.
Гьали энни башгъа сени
Уьюнг-оюнг елеген,
Яхшы булан яманынгны
Менден яхшы билеген.
Гетген-битген къайтмажакъны
Заман болгъан билмеге,
Тек гьали де гьасиретмен
Сизге багъып гелмеге.
Гьасиретмен
© Copyright: Нурьяна Арсланова, 2018
Свидетельство о публикации №118032511028
Свидетельство о публикации №118032511028
Рецензии