Яшым авруй. Сувукъ тийген оьзюне,
Иссилиги къоймай яшны айнама.
Къурчакълары бир мююшде мунгайгъан,
Болмайгъангъа оьзоер булан ойнама.
Яшым авруй. Къучагъымда буюкъгъан.
Эпсиз сакъ о оьзюн ерге салардан.
Ант этгендей къучагъымдан тюшмесге,
Къоркъагъандай къоюп гетип къалардан.
Гетмежекмен, азиз балам, бол сабур,
Къырыйынгда ананг барман, рагьат ят…
Сени къоюп ятар ерим – бир къабур,
Сени къоюп гетер ерим – ахырат…
Яратгъаным, гьайсыз къойма яшымны,
Байлыгъым ва барлыгъым о, девлетим.
Мен авруюм яман аврув къабунуп –
Сувукъ тийип аврумасын авлетим.
Сувукъ тийип аврумасын авлетим...
© Copyright: Нурьяна Арсланова, 2018
Свидетельство о публикации №118032511017
Свидетельство о публикации №118032511017
Рецензии