Къазанышым, Къазаныш!

Сагъа, юртум, къайгъы гелсе хапардан,
Юрек сызлап, ярыкъ гёзлер яшлана.
Ерни женнет бавудай дер дюньям да
Тувуп оьсген ата юртдан башлана.

Мен де сени бир аявлу къызынгман,
Гьар къайгъынга бир къыйналып гюеген,
Баш абатын отавунда алгъандай,
Арт тынышын сенде алма сюеген.

Къазанышым, ана болуп аядынг,
Магъа уллу шабагьатлар багъышлап.
Бугюн сагъа гьакъ юрекден йырлайман,
Барман деген батырларынг алгъышлап.

Инсандагъы чинк де сыйлы алгъышлар,
Юртум, сагъа тийишли деп айтаман.
Аз замангъа сенден арек чыкъсам да,
Сагъынчларым сезип, сагъа къайтаман.

Сени булан байлангъан сонг гьар гюнюм,
Сенде мени къуванчым да, ясым да.
Дагъы гёзел ер болмас деп ерлерде
Сенде къалсын тувагъан гьар яшым да.

Сенде, юртум, шатлы гюнлер кёп болсун,
Халкъ арангда болсун бирлик, татывлукъ.
Гьар даим де артсын сенде берекет,
Къартларынгны къолларыдай къатывлу.

Къазанышым, намуслар кёп алдынгда,
Насип болсун негетлеге етмеге…
Мен къабулман ругь байлыгъынг артсын деп,
Йырым булан сагъа кёмек этмеге.