Азиз анам... Женнет къушум... Бюлбюлюм...
Насип пайым... Юрегимни гесеги...
Гьава етип, алмакъ учун тынышым
Магъа нечик герегингни билсединг...
Муна бугюн, азиз Анам, бал Анам,
Муна бугюн мен де сендей анаман.
Яшларыма сен бизгедей, гёресен,
Гюнеш болуп мен де сендей янаман.
Тек бугюн де мени учун ерлерде
Гюн шавласан, биргине-бир ярыкъсан...
Сен чи бугюн, сен чи бугюн, юлдузум,
Алдындан да артыкъ магъа тарыкъсан.
Зар дюньяда къоркъмайгъаным яшама,
Сюрюнмелер гёрюнсе де ариде –
Къолум тутма сен баргъадыр янымда
Тамур бошап авмагъаным гьали де...
Сагъа, Анам, минг алгъышлар айтмагъа
Етмей къала къандырардай сёзлерим...
Яша, Анам, Атам булан янаша,
Яша, Анам, сувланмайлы гёзлеринг...
Азиз анам
© Copyright: Нурьяна Арсланова, 2018
Свидетельство о публикации №118032510891
Свидетельство о публикации №118032510891
Рецензии