Аталаны байрамы

Гьар бир гюнюн байрам этме умутда
Гюл уьзебиз аналагъа бермеге.
Ярараймы байрам гюнлер сама да
Аталагъа гюллер булан гелмеге?!
 
Эки билек ташдан къатты болса да,
Гёзелликге юрек бирде бегилмей...
Яшатагъан бизин гюлге ошатып,
Аталагъа гюллер неге берилмей?!
 
Аталаны игитлиги макъталгъан,
Къоччакълыгъы къатты ата юрекни.
Унутабыз бусакъ ярай бир-бирде
Шо юрекге бираз илгьам герекни.

Баласына насипли гюн гелгенде,
Гьакъ сююнчден тола экен шо юрек.
Къайгъы оьтсе, дертин бизден яшырып
Сакълама да бола экен шо юрек.

Ана юрек йимик сызлап бажара
Ата юрек, авлетлерин аягъан.
Анабыздай акъ юлдузгъа айланып,
Ёлубузгъа акъ шавлалар яягъан.

Атам ала авурумну асламын,
Ол дюр эки къанатымны бириси.
Бир къанаты сынып къалса къуш йылар,
Къушгъа азиз къанатланы гьариси.

…Муна – берме заман гелди Атама
Гюллер – герти, гьакъ гьюрметге белгидей.
Яманлардан якъламагъа яралгъан
Ататаланы гюнюн дюнья белгилей.

Арив-арив гюл байламлар жыймагъа
Яшлыгъымдан бир айланып гелейим.
Гюллени ва гюнлеримни барын да
Анам булан сагъа бир тенг бёлейим.

Азиз атам, якълавчумсан биринчи,
Билегингде къатты - мени талайым.
Гьар гюнюнгню бир гиччирек байрамгъа
Айландырма къабул кюйде къалайым!