Зайиф касдал завал хьайи,
Гужлудазни амбал хьайи,
Жуван кlацlал кьегьал хьайи
Дуьнья я им, дунья я.
Гьакь лагьайди шандакь ийир,
Нагьакьдани вич гьакь ийир,
Сад садални алакь тийир
Дуьнья я им, дунья я.
К1ани бере герек тахьай,
Пармакд кlаник эркек тахьай,
Кlевевайдаз куьмек тахьай
Дуьнья я им, дунья я.
Куьмек гайдаз хийир тийир,
Жувандакай фикир тийир,
Халкьди вилик вич пlир ийир
Дуьнья я им, дунья я.
Камалдиз гьич амал тахьай,
Ажуз ламразни ял тахьай,
Кесибдиз я гьалал тахьай
Дуьнья я им, дунья я.
Верчерикай кlекlер хьайи,
Кlекlеркайни къветер хьайи,
Къветеркайни регьбер хьайи
Дуьнья я им, дунья я.
Акьулдикай менфят тахьай,
Жувал жуван суфат тахьай,
Хийирдизни къамат тагай
Дуьнья я им, дунья я.
Пармак шалцихъ маса гайи,
Папан вилик кваса хьайи,
Жува жуваз жаза гайи
Дуьнья я им, дунья я.
Дуьнья я им
© Copyright: Магомед Мирзоев Мирзой, 2018
Свидетельство о публикации №118031704100
Свидетельство о публикации №118031704100
Рецензии