СИВ

СИВ

Дифракк кка сив.
Сивикк кка диф.
Дифрак ка мархь.
Мархьлик ка аяз.
Дифракк, каза сивик.
Сивик каза мархьликк.
Мяхъ хъабхъназук.
Жан дубхьнайиз назук.
Дергес хъайиз рюгьлихъ.
Мас айи банк – дасмликк.
Хилин гагьариин – к1ашар.
Духънайиз ликарин машар.
Калушар духьнайиз кьяши.
Гьатланмина гъюра гъунши.
– Халаванди хьуз ужур!
Пирс убшвури кимдарвук саб швур!
Бач1вугайси штукк йивури гъвал,
рюгьлер дахьнаяв мут1ан тму ягъал!
Саб мярх увут1ан айин гъубшвур!
Хъадак, гъушхьа гъулаз!
Масна уьл гъит сулаз!
Дейрсин рижв ккив ук1акк!
Кьас’ярна кьямкъ  – гунт1акк!
Хъалт-хъулт, хъалт-хъулт –
ма увуз саб хуттра! –
гъягъидихьа гъуншйир заансина,
ликариккна уч гъаши хъч1юхюри баршларра!
Ва – удудна йивурайи руч1 али жанарра!
– А вуйда! Саб мярх!
Дярярхру дейрсихьди?!
Ккайир дифран мархьликк
шул сарун бач1вугайси!
Саб гъвал’инди убшвурайир
швур ктадабхъди фици гъузур?!
Ав, мици гъабхьиш,
халра хьивди авадан!
Пирс дарди ц1аблин ук1 вуйиш,
лигуйза мици ягъалди мурар дахьуйиш!
Хътакуз пуз, хътакуз ккайир дайза!
Ригъ ктрубк1у мас ип1уз шлур дарза!
Сулариз кьюларна хуцар ац1на!
Йиз пеэриз гъубзри му баркаван!
Дейрсин рижна кьас’яр ккивуз хай шул!
Хъа гьит1ик1дарин хъалта-хъутари?
Дичибгнайи жандиъ му спиб ипиш
хутт гергмиди удубч1видарин?
Гьап1дива-хъа, уч1вархьа асизди к1улиъ
ккут1урччвайин, жвукь йивури,
кьяшишнакан, бат1рариз,
т1илиз пягьливниси,
му гюзел сиварин к1анакк,
хархли дифран лизишнаъ
ва мархьлин гъагъишнакк!
Гъач, гъунши,
гъягъидихьа ихь ужагъариз!
Гъарйирра ккилигурашул чпин жилариз,
марччариз ччиларси,
хябяхъдихъна лижгъян гъяйиз!