Фана дуьньядикай ханвай рикI,гуьгьуьл
Ярх хьанва шаир-камаллу Эмин.
Чин ачухначтIани уьмуьрди туькьуьл,
ЧIалазни ярдиз вафалу Эмин.
Дарман тахьай дерт хъати я фагъирдин.
Зайифбурун тереф хвейи гьахъвилин терез.
Эхир нефес мукьва жезва шаирдин,
Рахун яваш я,пилтек хьанва мез.
Туьквезбана кIвалин цлал кхьизва,
ЦIивин-къелем, цлакайни чар хьанва.
Сабур хуьзвай рикI жуьгьен хьиз ифизва.
Накъваркайни цлан пуна цIар хьанва.
Эхиримжи цIар ахгакьна шиирдин,
Агал хьана чешме дерин камалдин.
ЦIугъ акъатна Туьквезбанай ничхирдин,
Къутар хьанач чан къармахрай ажалдин.
"Я Мислимат, адан вилер ахъазма,
Са хупI яд це, рахух адав, я бала,
Кьенвач буба,зун а кардихъ ягъазвач,
Белки адан ви сесинихъ вил гала".
...Тикрарзава цлал алай кхьинар:
"Вил атIудач дуьньядихъай ширин я".
Вилер ахъаз фена гъиляй Эмин яр.
Туьквезбанан гъилемайди цIивин я.
Фена Эмин
© Copyright: Сейфудин Шахпазов, 2018
Свидетельство о публикации №118021811977
Свидетельство о публикации №118021811977
Рецензии