Шиирар!

 Шиирар са жерге я
Гьарма сад са жуьре я.
Инсанрин рик1ин сирер
Къалурзавай сегьне я.
Садан гафар гьайифдин
Фейи къариз талукь яз.
Масаданбур кхьенвай
Са гададал ашукь яз.
Сада тариф ийизва
Дуьньядин гуьзелвилин
Алакьзава , къалуриз
Тажуб жедай гьал вичин.
Садан ц1арар гьарай я
Кайи рик1яй акъатай
Маса ц1арар- бахтсузвал
Вуч-вичелай агатай.
Эхи ийиз тахьайла
Сада шиир туьк1уьрна.
Ц1ай туна къайи к1вале
Лампада экв куьк1уьрна.
Сад фена, рекьел алай
Цуьк сямишни тавуна.
Масада цуьк гахчуна
Къвазвай харни такуна.
Шииравай гьар са ц1ар
Гьар са касдин фикир я
Къелемди чарар гатаз
Шииратдин девир я.
Са шиира дугурда
Деве , рапун къекъуьндай
Бязибурун пис  к1валах
Виш сеферда  къехуьндай.
Зарафатдин гафарни
Жегъида чаз  шиирай
Шад ийиз чи гуьгуьлар
Акъат тийиз фикиррай.
Сада вичин тарифиз
Лап шаиррин хан жеда.
Са гаф пудра тикрариз
Халкьдин тариф , к1ан жеда.
Мад жеда маса ц1арар
Марф кьац1айди я лугьудай.
Садаз абур накъвар я
Атай цавун хурудай.
Са шаирар алахъда
Ягъиз мана сафунай
Гагь , гьалтда шиирарни
Кьил акъатдач гафунай
Гьик1 лагьайт1ан аквада
Гьакъикъат чаз ц1арара
Зайиф  хьайт1а акьада
Халкьдин гъуд, шит сарара.