Аяз бубадиз т1алабун

-Кьарай амач гуьзетмишиз,
Аяз буба, Живедин руш,
Чизва, квезни, азиз дустар
Ц1ийи йисан сувар я хуш!

Авачт1ани, гьайиф хьи,жив
Къвада белки, ама йикъар,
Безетмишиз ёлка гуьзел
Зи шадвилихъ авач кьадар.

Акалдайвал гьар са цуьрцехъ
Гзаф ава захъ безекар:
Гуьзгуьд шарар, сик1, къуьр, уьрдег,
Куьмекар гуз ша,биц1екар!

К1ук1ни кук1ва яру гъетре
Гуда ишигъ, чук1уриз нур,
Ам лишан я ислягьвилин,
Чи абур я, чи такабур.

Винелайгъуз гуз рап1рап1ар
Куьрсарда за лацу маргъал,
Гьар рангарин экверин ц1иргъ
Алчударда тарцин юкьвал.

Лугьуда за квез авайвал,
Савкьватрални ала зи рик1,
Аяз бубад сувар йифиз
Эцигзавай ёлкад к1аник.

Агакьнат1а, яраб, кагъаз
Зи т1алабун авай яргъаз?
Кьарай амач гуьзетмишиз,
- Аяз буба, гъваш жив, аяз.

Гат1унзава чаз рухсатар,
Авахьдай зун алерарай,
Бадед храй сун бегьлеяр
Хут1ун тийиз гъилерилай.

Живед нини, живед к1ват1ар,
Мурк кьур гуьне,авахьдай тик...
Зи вил ала, Аяз буба,
Гъваш вуна жив, акъудмир рик1!