Хьа б1аргаш кхи й1овхало телац,
Дего ший наь1араш елац,
Сабар уйлашт массаз деха,
Хало еча со ма веха.
1аьржа б1аргаш хьалха мо лекхац,
Са сибат 1а х1анза лехац,
Иштта дале хьо ма кхайкха,
Хьалх мо дац хьа хабар д1айха.
Б1аьстен зизаш вайга хьежац,
Малхо царна сердал телац,
Безамца уж деннад м1аьда,
Даха уж ма деннад к1аьда.
Къамаьле 1а х1анз со вувцац,
Аз лу марзо хьайна эцац,
Сацад вахар хьона хьеха,
Бала беча со ма веха.
Со вайча хьо г1озъянна елац,
Дешай марзо аз кхи мелац,
Х1аьта хьо согахь ма хьежа,
Эшац сон хьо, уйлашк деша.
Дегчур яьнна гаьна ехар,
Къиза хийцар 1а са вахар,
Сатем сабар хьайна деха,
Хало еча со ма веха.
Ахмад Шадиев (29.08.2015)
Ма веха
© Copyright: Ахмад Шадиев, 2017
Свидетельство о публикации №117121811041
Свидетельство о публикации №117121811041
Рецензии