ТIехьара ди

Наьна сибат духьала уха,
Еха ханашка со хьежа,
Еза йо1 сона дага уха,
Сай уйлашка со ма къежа.

Бе са доалаш ма да герза,
Дунецар къаста кийча ва,
Бокъо яц са юхаверза,
Нанас кхеваь со къонах ва.

Т1ехьар ди да яр сона,
Даймехк духьа со леж ва,
Баккха г1ерта со ер вонах,
Мохк лорбер амар да.

Сигале хьал хьежаш ва со,
К1уро 1аьржа ма яй из,
Б1айха малха лехаш латт со,
Амма боадо ювла къиз.

Бомбай таташ ма да дувлаш,
Наьна лаьтта човнаш яй,
Са дегаь из ла ца могаш,
Сакхетама сон чов яй.

Дагайоха сон урамаш,
Берий хана сай лайза,
Чудетт х1анза цига герзаш,
1аьржа к1ур лакхе хьайзаб.

Хьа духьа со ле Даькъасте,
Хьа духьа аз дула са,
Байн вежарий никъ йисте,
Бадаш ба, тохалац са.

Мискачу вай ноаной белхар,
Хозаш да х1ара ми1инге,
Къонгаш - м цара д1акхалхар,
Белхаш бада уж царн юхе.

Боаккха бала бессаб вайна,
З1амиг къам ма дохалахь,
К1анто де мел дезар сайгар,
Дергда, Даьхе  тешалахь.

Ц1аьхха яьннач йоккха топо,
Уйлангара ваьккхар со,
Моастаг1ий т1абоаг1а фордо,
Гуча даьккхар доаг1а во.

Бийнаш а сай ч1оаг1адаь,
Сай герз духьал оттадир,
Майрал дег чу соцаяь,
Иблисашта духьал ваьлар.

Сай мохк массаза лорбе,
Даьлага аз биаб дув,
Къаман маьршо ц1ийца лоръе,
Халкъо ший во1 даим зув.

Борз санн лата ва со кийча,
Берзо - нанас вокхаваь ва,
Майраллах а ва со лийча,
Яхьах вузавеш кхеваь ва.

Т1еман юкъе ваьлар со,
Г1аьрхой синош д1аахийта,
Х1аьта 1оажал б1аргаго,
Езаш хилар, ма валийта.

Села сиха ма валийт со,
Пурам ле кхи а т1ома бе,
Пурам ле, сог садахийта,
Даймехк фоца 1абаве.

Амма хаьтта йоаг1ац 1оажал,
Дег1ах сона пхо кхиттар,
Б1аргашта еттало боадо,
Даьла ц1и ях волавелар.

Юхь т1а мела т1адам бахар,
Б1аргара бежар жовхьар са,
Лаьтта лордеш ена 1оажал,
Езаш хилар т1аэца.

Ц1аьхха нанас теркдаь ага,
Са доалаш сон дагдехар,
Сай тхьувсавеш лийкха иллеш,
Велар даьнна даг дессар.

Велавенна волаш улаш,
Човний лазар дицделар,
Лакха кхеста аьрзе а гуш,
Аьхартенгахь со вийрзар.

Сайн т1адилла дино декхар,
Чакхдаьккхар, Даьл тешалахь,
Лоаца хилар къона вахар,
Аллахь 1а сон гешт делахь....

Ахьмад Шадиев (21.05.2015)