К1анивилин сувар

Нянин вахт тир, чи кьве  жегьил,
Акъвазнавай тарцин к1аник,
Сада садан кьунавай гъил,
К1анивилин гьисс кваз рик1ик.

И береда цавун капал
К1ват1 жезавай  са-сад гъетер,
Са вил ягъиз чилиз яргъал,
Куь1уьрзавай якъут эквер.

Абрун патав  цифераллаз
Гимишдин варзни атана
Гъетерни варз - цава къугъваз -
Чилелни - жегьил рахана:

Зи к1аниди, килиг цавуз,
Жавагьиррив ац1анавай…
Вири гъетер гьазур я гуз -
Ваз - гуьруьшдиз атанавай.

Савкьват хьурай ваз и алем -
Чанни вахъ гуз гьич гьайиф туш,
Гъетер къачу - ч1агур  перем,
Зуьгьре Гъетрез - кьилин кук1уш.
.
Вун булахдал къведайла за
Цуькверикай гам вегьеда …
Зи уьмуьрдин, марвар багьа,
Ац1ай квар гваз вун хкведа…

И гафариз кьакьан цавай
Гъетерини яб гузавай,
Лезги лекьре рушаз лагьай,
Гафар абру кьат1узавай,

Чи жегьилриз са вил ягъиз,
Нураралди нехишзавай:
Акъатуй куь эсер кьилиз!-
Лугьуз абру алхишзавай.

Цавун аршда, гъетер къугъваз,
К1анивилин сувар я къе.
Ц1ийи вацра абрухъ галаз,
Куьк1уьрзава гьар са легьзе.
17.12.2017

картинка с Интернета