Халкьдиинна дуфна к1ару йигъар

ХАЛКЬДИИННА ДУФНА К1АРУ ЙИГЪАР

Узу ап1урайи ляхин
Варит1ан… варит1ан… зина вуйиз!
Йиз дидиз дилигну,
Узуз рубкьру йиз гьюрмат чавай!

Узкан бик1ай… узу улупай…
Учву к1уруб вари ап1ураза!
Дюз вуйиб – даруб, мидкан аьгъяди гьазк1а даричв!
Узуз йивай ичв йивру гарччвлар вари!

Узу вуза му деврин асул ва намус!
Узу пидиза учву гьап1руш ва фу к1уруш!
Йиз ччвур ибшри варишвариъ: жилиинси завариъра!
Фукьан ккундучвуз? Мавай пулра учвуз кьадарсуз!

Йиз сурат мистариъси халачйириъра т1ап1ай!
Йиз ччвурнахъ даруб фук1а дарибшри!
Узу т1уб алап1уриин алархьай!
Узуз къаршур ихь девриан терг ап1инай!

Йиз гьюрмат варишвариъ аьхюб вуйиз!
Фу к1ури узуз яв теклифар диврава?!!
Кьуттияр наан а, хъа лиг увуз!
Вазнанна ва дидин улматдин агьна ахту алириз!

Йиз ушвнин гаф, увуз аьгъяш,
Увуз туврайи гъизилик гьисаб вуйиз!
Йиз рябкъбан успагьи юруш
Увуз уву икрам ап1ру умчар вуйиз!

Увук гъилигган узу
Завариъ дубхьну ккуни тахтниин алза!
Ляхлаарин ликарикк ккайи гъяргъну
К1уру гафар узу зат гъададагъарза!

Пайгъамбриз «аькьюл» тувур узу вуза!
Ич аллагьра йиз гъуллугънаъ дерккназа!
Хъа тму Мярдягьяйиз йиз заанвал гьаз рябкъюрадар!
Варидари узуз икрам ап1ура, хъа тгъаз узу гьясбикк гьаз ккадар?!!

Табасаранарин шагь, паччгьарин ханум узу вуза!
Йиз адна тяриф адрушваъ ил адар!
Хъа тму Мердешейиз, икрам дарибшри,
Узуз гаф хътабгъуз шлу кьувват наънан гъюра?!!

Ургуразу… урхьуразу…
Ичв Аман вуза! Ичв Иман вуза!
Мутуванай рякъ, гъяргъяр али ханжлиз!
Ккивай илдандин рукьар жугьуд хъюнт1ичиз!

Ч1арк1ай… чархьай…
Дугъан кьувват тадабгъну узуз чавай!
Мибисанай дугъан ччвур йиз багахь!
Урхьурузу… ургурузу…
Узук кабхънайи ц1а гьадму хачрак кипай!