Кёклер йылай къайгъырып

Кёклер йылай къайгъырып
Бу умметни гьалына
Салам - дей жан къайтарып
Башгъаны саламына.

- Салам!
- Сагъада салам.
- Къайдан гелдинг сен, улан?
Гелегенге ошайсан
Сен мунда ананг булан.

- Дурус айтасанг, гелдим
Анам булан аявлу
Бизин ажизлигибиз
Къыргъын булан байлавлу.

Анама гюлле тийип
Тез оьлдю кёп къыйналмай
Мен бир аз узакъ къалдым
Акъ кетенге чырмалмай.

Муна гьали табушуп
Бек сююндюм гёргенге
Бир де къайгъырма тюшмей
Гьазир булай оьлгенге.
Нечесе насипсизлер
Къалды дунья яшавда
Не ятма оруну ёкъ
Гьайы тюгюл ашавда.

Гюнлени узагъында
Яшын яшына туруп
Къутулуп болмай къала
Йиберсе топлар уруп.

Къара булутдай гелип
Баса халкъгъа къарамай
Шолай зулмучу болма
Инсанлагъа ярамай.

Умут къалмады халкъда
Бу пелекет битер деп
Болуп турагъан гьалгъа
Душман эте уллу кеп.

Аллагь этсин олагъа
Гаурлагъа этерни
Гёрсетер Яратгъаным
Зулмучугъа бетерни.

Ондан сонг пысып улан
Анасына къарады
Ана ону къан башын
Къолу булан тарады
Къолу къангъа батсада
Ондан атир йис геле
Сонг ана баласына
Айтма ихтияр бере.

- мен Халибни яшыман
Хараб болгъан Шамдагъы
Сен де къайдан гелгенсен?
Яшырмайлы айт дагъы.

Бу яш бек пашман болуп
Аякъ тюпге къарады
Сонг огъар бириси яш
Бир дагъыда сорады

Улан гётерип башын
Къарады ари янга
Ону да толгъан экен
Мииси ала къангъа

- Сени халкъынг о янда
Гёре бусанг женнетни
Къапусунда токътагъан
Онча къара миллетни?

Бар сен олагъа къошул
Олар сагъа бозаргъан
Женнет ашларын ашап
Яякълары къызаргъан.
Мен яшыман Гъаззаны
Палестин буччагъында
Гетмеге тюшюп къалды
Магъа булай чагъымда.

Мактабгъа бара эдим
Китапларымны алып
Асгери тиреп урду
Тюбекге гюлле салып

Менде янгыз тюгюлмен
Халкъым бар ари янда
Битмеген бир ишим бар
Битсе къалыр гьаманда

Анама айтгъан эдим
Мен женнетге гиргенче
Сагъа къарап турарман
Сен гелген сонг биз бирче
Къолунг тутуп гирербиз
Сонг атамны излербиз
Ону булан агъамны
Бабам булан Дадамны
Къурдашларым, досларым
Мени къыз къардашларым
Гетип гетип къалдылар
Душманланы къолундан
Бирлери орам бойда
Бирлер гетди орнундан.
Хапарсыз тие эди
Ол душманны гюллеси
Чачырап гетгей эди
Ону чачал келлеси.

Бизгеде, шек ёкъ эди
Бир хадиргюн тувар деп
Уллу агьлюбюз булан
Женнетде ёлугъар деп.

Гьали къалды бир анам
Нишан болуп душмангъа
Ону сагъынмакълыкъдан
Мен мунчада пашманман.

Барыгъыз, алгъасагъыз
Женнет сизге къарагъан
Анам булан гелирмен
Ёл булан сиз барагъан.

Кёклер йылай къайгъырып
Бу умметни гьалына
Гюн сайын гече сайын
Ерге сюек салына.


29 Къочкъар 2016