Намус къайда сатыла?
Барып сатып алмагъа
Арив кюйлеп, онгарып
Юрегиме салмагъа.
Юрек къайда сатыла?
Рагьму, сюювден толгъан
Алдагъы оьзденлерде
Шолай юреклер болгъан.
Гьакъыл къайда сатыла?
Алар эдим бир увуч
Гишини ойларына
Болмас эдим урлавуч.
Эдеп къайда сатыла?
Чепкендей гиер эдим
Онуда тапма болмай
Хыйлы заман изледим.
Иман къайда сатыла?
Чархны ругьландырагъан
Аллагь учун чалышып
Умматны къаттырагъан.
Айтыгъыз чы - оьзденлик
не базарда сатыла?
Ону тас этип халкъым
тюпден оьрге атыла.
Бу барыда байлыкълар
Бизде бола инг башлап
Сонг аявлап бажармай
Къоябыз, сатып, ташлап.
Аявлап бажарайыкъ
Ессибиз берген затны
Пурч этсек бу байлыкъны
Аларбыз яман атны.
29 Къочкъар / 2016
Намус къайда сатыла?
© Copyright: Ибрагим Махтибеков, 2017
Свидетельство о публикации №117111201137
Свидетельство о публикации №117111201137
Рецензии