Сагьна

Шулай бир пикру гелди
Эртенокъ эсибизге
Илгьам этгенге болсун
Макътавлар Ессибизге.

Пикрум мени сагьнада
Къумукъ театырдагъы
Тамазалар жыйылгъан
Гьар тюрлю замандагъы.

Мунда бар Абсупиян
Акайланы огълусу
Нугьай булан Солтанмут
Оьзденликни аслусу.

Базалай, Аликъылыч
Йырчы Къазакъ озокъда
Артдагъы девюрлюлер
Гетгенлери тезокъда.

Валь гьасил булай мурад
Буланы жыйылмагъы
Гьалиги девюрлерде
Къумукълар яйылмагъы.

Миллет бите бара деп
Оланы къайгъырмагъы
Къолдан тюшюп жабаргъа
Тапталгъанга байрагъы.

Оланы къавшалтагъан
Агьвалатлар гьар-тюрлю
Абурсуз болгъанына
Таварих китап, нюрлю.

Ач кулайлар башлагъан
Къыччырып гьапламагъа
Биз бажармай турабыз
Миллетни сакъламагъа.

Бу тамазаларыбыз
Гьикматларын сёйлесин
Артда васият этип
Сагьнадан тайып гетсин.

Сонг бош къалгъан сагьнагъа
Яш оьрюмлер жыйылсын
Тамаза васиятгъа
Ваъда негет къыйылсын.

Ругьландырагъан сёзлер
Адамлагъа айтылар
Байракъ гётерилгенсонг
Кёкде янгы ай тувар.

Гьай нечикде, айтаман
Юрегимни къыйынын
Биревлер узатар деп
Бу такъмакъны жыйымын.

Мени эсиме геле
Бар деп бизде уланлар
Шу пикрулагъа гёре
Къуруп болажакъ планлар

Аслу мурад - айыкъмакъ
Юхудан узатылгъан
Амма, сен уянгынча
Сени атынг сатылгъан.

Сценарист тарыкъ бизге
Узун сёзню къысгъасы
Къумукълар язмасада
Язар ону басгъасы.

Шакъытилге алышдыр
Тот басгъан тюбеклени
Шуну айта Ибрагьим
яшы Магьдибеклени.

28 Кюржан 2016