В. Пшавела. Хьаьшеи фусам-даи. 15 дакъа

XV

Къорча буса, лоам тIа гIолла,
Тийна Джахола улча,
Тамашне цхьа бIалгIа[1] хийла
Хоалу, цIаьхха хьажача.
Цхьоал юача цхьан боарза тIа
Кхайк из вехаш Iелевар.
Йох Звиадаурга: «Гойта
Юхь, са воша, хьамсар вар».
ТIаккха, гаьннарча кашмашка,
Дуташ цуча ший цхаь Iар,
Йолаш бирсал юхьмарашка
ХьагIотт хевсур ший кашар.
Чамза[2] ва Звиадаури.
ЦIимхара да хьахьажар.
Ший сибат хIанз шийна горе,
Лоамаш цо Iаоардаргдар.
Верриг ваьрда ва Iазапхо.
ХIета а, кура этта латт.
Къегаш, сердал тувс цун герзо.
Наькх тIа кулгаш ший дахкад
Уж шиъ эттача чхара тIа,
ТIеххьашка Агаза отт.

ГIийло Кавказа бовхьашта
Юкъе цIера ала боал.
Йиша хинна, вежарашта
Даар деш Агаза йоал.
Баьде бийса. Халла хоалуш,
Мелла йоагача цIарца
ДоттагIий ба шойла тарлуш,
Сакъердалуш хабарца.
Дувц цар наьха гIулак, денал.
Тамаш йола эздел дувц.
Хьаьша лархIар – хоза масал,
Шеддолчуна ду цогI куц.
ДоттагIалла, тешам, сий дар –
Деррига дувц, ца бузаш..
ХIанз уж цхьана бIарга гуш вар
Хьеж, бIарга са ца дузаш

Охца[3] йолча кхела низо, –
БIарга хоадалар дайна, –
Дехко[4], цу бикъача кIуро,
Гойтац турпалхой вайна.
ГIотт из баьде пордув санна,
Цу лакхален хозалца.
ХIамадуллац онда цунна,
Дошалац бозбуачалца[5].
ЦIогI ухаш я шовдан чIоже.
Кхайкаш я из йиш хаьла.
Маьлха зизильг, лоамий хозле,
Iочухьеж цу чIожан бухе
Ховха кортилг чуэлла.

I893.

(ГIалгIай метта даьккхад 20I6-ча шера.)

Таржам даьр Коазой Аслан









[1] БIалгIа (гIал.) – призрак, видение (эрс.)
[2] Чамза, чам боацаш – гIал.
[3] Охца (гIал.) – грубо (эрс.). Охца кхел – грубый рок (судьба).
[4] Дохк, дехко (гIал.) – туман (эрс.) в разных падежах.
[5] Бозбуачал (гIал.) – волшебство аьнна кхетаде деза (эрс.)