В. Пшавела. Хьаьшеи фусам-даи. 14 дакъа

XIV

Бийс я... ДуI(1)  да… КорзагIбаьнна
Мух ба хьувзаш аренца.
Даьла! Наькъхо, коара ваьнна,
Лораве къахетамца.
Гешт де бошта, уж ца дойташ, –
Веза а, воккха а Хьо ма вий!
Мела, ийшавар ца вуташ,
Хьай аьттонца Iалашбий.
Цар узамаш, зизаш хулаш,
Хьа Iаршан тIа(2) кхачар товр.
Нагахь, дале из цатоъаш,
Синош Iа дIаэцар ловр.
Ди – ма къувкъа, кхерам – бада,
ДIа-юх йоха, морхаш, шо.

Шовда IувгIаш, талгIе ловзаш –
Хиш да хьувзаш, байна мах.
Хина бух(3) ба дарха(4), белхаш,
Цакхеталуш долчунах.
Къора да хий наха ловчоа,
Бовзац каша кхерам цун.
ХIета а, велавалар дечоа,
Низ дIагойт ший эгIазлон.

Михьарбаьннаб(5) мух. Ца соцаш,
Чхарашкара боадо кхухь.
Кхалсаг я тархе тIа латташ
Боадонца увш, бетташ мухь.
Мосаш я цун михца гIетташ.
Шелало ший кхерам тувс.
Бовча седкъаца да лепаш
Эга юхь цун, байна бос.
Сихча шовдан IотIасатта,
КорзагIъяьнна хьеж Iо чу:
Унзар да хьо, талгIай тата,
IувгIар дувлача хи чу.
Бух(6) тIа кхаччал мочхал дийла,
Буса цогI дувл чIоженга.

Малав баьдеча укх буса
Цунах кхета, соцае?
Цхьаккха вац! ДIакъайлар бIарг-са,
Хичу кхоссаелар ше.
Эггар ираз дайна кхералг –
Из а моастагI хилча ший;
Кхоачаделча рузкъан декъилг,
Нах безарах пайда бий?
Дегчу къувлаш дорха ала,
Мишта ях из нахаца,
КIистий мехка хьегаш бала?..
Хургъя хIанз ший мараца!
Мари сесагеи къинца
Цхьана бехьбенна ма бий:
Мар – цатовш хилар амарца,
Ер – моастагIчох ухаш хий.
Йихьар шовдано Агаза,
Ачах(7), гIомарах дIаувж.


1 ДуI (гIал.) – буря (эрс.)
2 Даьла Iарш (гIал.) – Трон Господний (эрс.)
3 Хина бух (гIал.) – пучина (эрс.);
4 Дорха (гIал.) – злобный (эрс.)
5 Михьарбаьннаб (гIал.) – укхаз «бушует» (эрс.) аьнна кхетаде деза.
6 Бух (гIал.) – дно (эрс.)
7 Ача (гIал.) – ил (эрс.)