Ертуб ва чвурхуб мярх ва мярхяр

ЕРТУБ ВА ЧВУРХУБ…
МЯРХ ВА МЯРХЯР…

Кабк1ра шил
Ертурайи баяри,
Чвурхурайи шубари.

Дубхьна гюзгюси йиф
Мярхяр алдахбу,
Калушар улчвухбу
Асккан рякъюъ…

***

Ккабк1ра мярх
Пирпун дару
Лич1варилан зигбу
Ук1 хьади
Сив’ансина гъюру.

Ут1уснайи к1ик1лариан...
Сак1ал йифкан
Ширк1ар ккут1урччвура…
Кьярттарра шула буш…

К1арчарин т1урнихъан
Чавра, ап1ури  гуж,
Ижмиди зигура нежбри,
Хъюхъярира ап1ури ч1уш…

Ук1ан мярх йицарихьан
Ккюч1юбгъюз шуладар…
Дирибггна куркул…
Алди угъин плайиин…

Аман адабт1у кас,
Дазабгну жвяркъи т1ул,
Ертурайидарихъ,
Чвурхурайидарихъ хъергру
Йибчури шруш…

Амма, баяр-шубар,
Гьергру гьубкьушвахъинди сар,
Дукарси, гунт1арси,
Ямажнакансина кригъурайи.

Мярхликк ккайи йицарси,
Мура, шилнаккан
Ккут1убччвну хахул,
Алдакуру кьаби-кьюцирси…

Раццарихъ – гьарйир-дихар...
Заъхъан гьягьйир-к1ик1йир
Ут1урччвуру женжеллуйирин...
Тамаша ал дарчариин бабарин…

Ва гъизгъин гъахьи нежбру
Шил убкури улуч1вуру
Мярхлилан алдабгъу
Ек1ухьди гурдахъ шлу…

«Ишричву дармадагъин
Т1ягънарди хъиршнайи бал’ар…» –
Хъа мугъан гьамциб мукьамра
Гьар йивурайи хавлихъ ва мурзнахъ…

«Я люкьнарин гаргун, –
к1уру мугъаз сари, –
Асккан рякъ’анди дарш
Гъягъюз шулдарин латарихъанди!»

Мици гъеебхьури
П1ап1ах йивну йифуз
Хъюгъру убччвури чан к1ул
Хъял гъюбхьан
Гьархну фикир ап1уз,
Бизардайири
"Т1ягънарикан" ккундайири
Бала гъадабгъуз.
...
...Алдасу бабар дарчарилан,
Жилар – раццарилан,
Аларснайидар,
Улдаригъян лигурайи...

...Сарун шилра утура
Гюнейин гъатху штари...
...
Магьа фу-вуш хъана убгъура...
Бачк1арси, ваъ, баршларси...
Амма жил лизи шуладар...
Ккудук1ура баяр-шубарин карк1увалар...
Плайинна дарин язухъ...
Ухъра жил...
Ляхлаарин гъюляригъ.