В. Пшавела. Хьаьшеи фусам-даи. 6 дакъа

VI

Пхьена[1] дехьа, малхо бетта,
Матарбаха ба цхьа боарз.
Цунна дехьа, ха тIа этта
Латташ гу хьунгаьний оарц.
Из ба нийлхха баьнна оаса.
Iемарашта ду цо ха.
Болаш санна хет из Iаса.
Кадаш хет цун гаьний гIа.
Цигчу, лаьтта, Iана дийша
Да сатийна хьулалуш,
Ломех  тара, майра лийта,
Синош дита дегIамаш.
Хиво Iалашдаьд уж цкъара,
Цун тIоадалца лувчадаьд;
Лоамо, тIаккха, мадагарра,
Лоабатаца хьоарчадаьд.
Кхерий моарталана[2] кIала
Дувхьац дегаш турпалий,
Къизача цу лаьттан кера
Мурлу тIехкаш къонахий.
Майра, дорха хинначара,
Довна юкъе ка ца луш,
Довта сийле кхаьбачара
Сибат да хIанз хувцалуш.
Иштта да-кх ер маьлха дуне.
Цох са гIайгIа йоккха я.
Хиларах хьо сина айпе,
ЧIоагIа хиларах хьа сийле,
Ехкаш массанахьа кIийло,
Iоажал гарга лелаш я.

Гилакема[3] кIалтIадоале,
Неканчий[4] а Iохьоргба.

Маьлха сердал яла кхелехь,
Тхир дIадовлехь арешка,
Михо сецца лоаме хьелехь,
Самукъдоахаш чIожешка,
Гучаийккхар тоаба цIаьхха
Цхьан лакхача гувна тIа,
Долаш санна оарц из даьккха
Зулам къовла нийсон тIа.
Ва Звиадаури вийхка,
Чувхаву тIехь тоабано.
ДегI да оасашца цун дийхка,
ДIавихьа ва уйлано.
Малав укхаз цох къахийтта,
Цуна къина велхаргвар,
Сихха дIаве уйла хетта,
Волаш хилча массавар?
Ший Iоажалах кхер хIаравар.
ХIета а, кхычун вер дича,
Цунга хьажа отт хийлавар,
Сакъердалуш, из гича.
О, мел къизеш[5] бейзаб сона, –
Шоаш ма ярра Iовдалаш,
Дог ца Iабаш хулча вона, –
Къинах йиза хурделаш.
Шоай юхьан тIа лир долаш мо,
Гу хийла цар курал еш,
Шоашца йолаш син-паргIато,
Хул уж лаьтта дIалелаш.





[1] Пхьена дехьа (гIалг.) – за аулом (эрс.)
[2] Кхерий моартал (гIал.) – каменный гроб (эрс.0
[3] Гилакема (гIал.) – ладья, лодка (эрс.)
[4] Неканчий (гIал.) – пловцы (эрс.)
[5] Къизи (гIал.) – жестокий человек (эрс.)