Учып юрем анда-мында,
Кузьнинъ пуслу сабасында.
Мен — ель, мен — джоюлгъан гонъюль,
Мекян тапалмагъан омюр.
Меним яшайышым — учуш,
Эм дешетли, сонъсуз уруш.
Ельнен ёлдаш олып кетем,
Бунъа базан элем этем.
Агъыр кольге киби олдым,
Чечек киби бирден солдым.
Мен — ель, мен — джоюлгъан гонъюль,
Меджхуллерни саргъан омюр.
Кече айлар, кече йыллар,
Сонъ ачыла эски сырлар.
Истей эдим гузель сызмакъ,
Омюримни ренкли япмакъ...
Лякин шимди бир ель киби,
Дагъдан атылгъан сель киби,
Учып юрем анда-мында,
Сувукъ ве бельгисиз ёлда.
Бельки де умютсиз юрип,
Бир кунь тапарым мен ярыкъ,
Кунеш парлакъ шавле сачар,
Такъдириме ёллар ачар…
Майыс 21, 2006 с.
Мен - ель...
© Copyright: Эльмара Мустафа, 2017
Свидетельство о публикации №117102010880
Свидетельство о публикации №117102010880
Рецензии