Янъы йыл бизге келе

Уча яваш-яваш акъ къар данелери,
Къача бизден, къача эски йыл куньлери.
Муджизели байрам эр бир эвге кире,
Озюнен буюк шенълик ве бахт кетире.
Янъы йылда даа пек чокъ умют олур.
Янъы, янъы ниетлернен
зенгинлешир омюр.
Севги, акъикъий севгини
эр бир янъгъыз дуяр.
Янъы яхшы денъишмелер
алып келир рузгяр.

Багълама:
Мелеклер коктен эне, юкъусындан уяна,
Самимий тебессюмлер юзьлерде яна-яна,
Къальблерни къувандыра, байрамны яраштыра.
Мелеклер коктен эне эм ойнай, эм де куле,
Тылсымлы масал киби, яваш адымлар иле,
Янъы йыл бизге келе, янъы йыл бизге келе.

Гедже къаранлыгъын юз бинъ йылдыз якъа,
Эм шу дакъкъаларда бакъа, бизге бакъа.
Бу алемге ярыкъ, мераметлик сача,
Янъы келеджекке къапуларын ача.
Янъы йылда даа пек чокъ умют олур.
Янъы, янъы ниетлернен
зенгинлешир омюр.
Къысмет, бекленильген къысмет
озь саибин тапар
Ве узакътан, мавы коклер
бизге дуа япар.

Багълама.

Декабрь, 2012 с.