Къаьра шоатта

(илли)

         (1992-ча шера гурахьа
         гIалгIай къаманна тIадена
         хатар дагалаьца)

Ма дорха дера хьо,
Ва къаьра ва шоатта,
Да висар кхераш мо
Ший коа тIа ва отта.
Ма чамза хилар хьа
ЦIийх биза боара кад,
Ма къизал гойтар Iа
Хьай дог тхох мелла Iад.

ТIехьа оалар:
Маьржа-яI, маьржа-яI,
Маьржа-яI, хьо дуне.
Маьржа-яI, маьржа-яI,
ХIанад хьо балане?

Ма бирса хилар хьо,
Ва къаьра ва шоатта,
Дай мехках доахаш тхо,
Хийра нах мо, атта.
Ма шийла хилар-кха
Хьа боага дошо малх –
Шелладеш дегаш тха,
Белхабеш миска нах.

ТIехьа оалар:
Маьржа-яI, маьржа-яI,
Маьржа-яI, хьо дуне.
Маьржа-яI, маьржа-яI,
ХIанад хьо балане?

Ма дукха ла йийзай
Вахара халонаш.
Ма дукха эшаяьй
Дунена харцонаш…
Тахан а дахаш да
Нийсхонга дог доахаш,
КIаьд ца луш долхаш да
Бокъонга гIа боахаш.

ТIехьа оалар:
Маьржа-яI, маьржа-яI,
Маьржа-яI, хьо дуне.
Маьржа-яI, маьржа-яI,
Ма хила балане.

Октябрь 2017 шу.