Да виса...

/илли-реквием/

(1992-ча шера гурахьа
гIалгIай къаманна тIадена
хатар дагалаьца)

Да виса, моажа малх,
Хьо сенна белха-те?
ХIана ба селла дорха,
Чувхадеш сийрда ди?
Да виса хьа, Дуне!
Хьо къиза хIанад-те,
Дог-ийша тха Даьхе
Увттаеш балане?

Да виса, да виса,
Да виса хьа, Дуне.
Да виса, да виса,
Да виса хьа, Дуне.

Из къийкъар ди дарий?-
Гуйранца из къувкъац.
Боад тийсар морх ярий?-
Ди къаьгача из хилац.
Из дийнар тата дар
Йоаккхача ва топий,
Боад тийсар кIура бар
Йоагача дай юртий.

Да виса, да виса,
Да виса хьа, Дуне.
Да виса, да виса,
Да виса хьа, Дуне.

Цу цIаро йоагаяьр
ГIалм-аре ва еций?
Чил хинна аллийсар
Вай Даьхе ва еций?
ЦIий беса ва дийрзар
Вай ГIалми ва деций?
Харцоно эшаваьр
Хьо, гIалгIа, ва веций?

Да виса, да виса,
Да виса хьа, Дуне.
Да виса, да виса,
Да виса хьа, Дуне.

Тхо кхелла, тха Даьла!
Хьай гешт Iа тхона де,
Цу дуIах байнараш,
Ялсмале Iа нийсбе,
Мохк безаш баьхараш,
Мехкаха Iа кхебе,
Тха дола ноахалаш
Машарца Iалашде.

Да виса, да виса,
Да виса хьа, Дуне.
Да виса, да виса,
Да виса хьа, Дуне.

Октябрь 2017 шу.