Сваю не страцьце галаву

Знік неяк Гаспадар на дзень...
Няведама, з якой нагоды
З'явіўся на двары Кабель,
Няведама, якой пароды.

І стаў усіх ён павучаць,
Што модна сёлета брахаць.

- Ніколі не брахалі мы! -
Крычаў Казёл, квахталі Куры.
- З якой жа гэта навінЫ
Нам трэба быць у сабачай шкуры?

- І не брахалі Індыкі
З усіх часоў ва ўсе вякі!

- На вёсцы кожны нагадае:
Не брэша Певень, а спявае!

Пачаўся гвалт. Тады Кабель
Завыў, як воўк зімой на поўню.
Усе замоўклі. Узлез на пень
І распачаў: - Мае шаноўныя!

Для вас я лепшага хачу,
Таму па-новаму вучу!
Паразумнееце адразу:
Брахаць - патрабаванне часу!

Карова ўсё перажавала
І вельмі моцна ... забрахала.

Што загучала на двары -
Вам і не перадаць, сябры!

Перабрахалі алфавіт,
Перабрахалі колькасць яек
І на ўсю вёску, як маглі,
"Сучасна" песню забрахалі...

З'явіўся Гаспадар - Кабель
Знік. Недзе гойсае па свеце.
І, кажуць, зараз кожны дзень
Усё нешта брэша ў інтэрнэце.

А можа, завітаў  да вас
Сказаць, што патрабуе час?!

...............................
Брахаць і без навукі можна,
А жыць дурны не дапаможа.
Таму праз усякае "гу-гу"
Сваю не страцьце галаву.