МультАзбука - на татарском языке

МультӘлифба

А

Аю абзый базардан
Бал алган алты мичкә.
Арбасы авыр, арган -
Этә ул көчкә-көчкә.

Ә

Әтәч менә будильник,
Шалтырамый икән ник?
Ул кычкырып уята -
Кем озак йоклап ята?

Б

Бозау итеннән бәлеш
Көтә бүре балалары.
"Барыгызга булыр өлеш,"-
Дип әйтте аналары.

В

"Вакыт үтә юкка,- диделәр,
Яшь әтәчләр вәгъдә бирделәр,-
Вак-төяккә гел сугышмыйк,
Дус яшәргә без тырышыйк.

Г

Гайбәт сата көне буе,
Саескан таба сәбәп.
Гаепләү бөтен уе -
Бу нинди начар гадәт?

Д

Дуңгыз баласы бүген
Дәрескә әзер түгел.
Дәфтәре өйдә калды,
Шуңа "2"ле алды.

Е

Елга буенда яши
Елак елан баласы.
Бер дә кипми күз яше,
Аптырады анасы.

Ё

Жонглёр иде клоун циркта,
Ике аю боксёр рингта,
Маймыл анда шофёр иде,
Ә песиләр күлмәк киде.

Ж

Жирафта кара пиджак,
Аның жилеты да бар,
Галстук сары, күлмәк ак,
Ләкин чалбары бик тар.

Җ

Җәй җиткәч, җомга көнне
Балыкларны җыйдылар,
Киңәшеп, карт җәенне
Судья итеп куйдылар.

З

Зебра сатып алган икән
Затлы зәңгәр тукыма.
"Зинһар күлмәк тек,"-дигән
Ул тегүче дустына.

И

Ишәк кибеткә килгән,
Тишек башмаклар кигән.
"Минем аяклар туңа,
Итек бирегез миңа."

Й

Йорт төзегән җир астында,
Йозак кирәкми хәтта.
Йомран салам өстендә
Йомшакта йоклап ята.

К

Куян утыртты иртән
Кәбестә белән кишер,
Ясаса тагын киртә,
Әйбәт уңыш җитешер.

Л

Лачын көчле һәм батыр,
Шөгыльләнә ау белән.
Ләкләк исә бик матур,
Бәхет китерә, беләм.

М

Маймыл малае Мокыт
Елмая, уйный, көлә.
Мөлаем ул һәрвакыт,
Мәзәкләр дә күп белә.

Н

Нарат һәрчак мактана:
- Мин биек булып үсәм,
Бик нык һәм нәфис кәүсәм.
- Мактану начар гадәт,
Белергә кирәк әдәп,-
Дип әйткән Имән аңа.

ң

- Бәрәңге, ничек хәлең?
- Бик уңай түгел әле.
Ашый мине көнозын
Колорадо коңгызы.

О

Оча безләп озынборын.
Ул тешләргә эзли урын,
Чеметтерде колак турын,
Озынборын - очлыборын.

Ө

Өлгер Өммениса эшкә,
Барына да җитешкән,
Ризыклары аның пешкән-
Өчпочмак белән бөккән.
Җыештырган ул өен,
Һәр эшнең белә көен.

П

Песи түти кунак көтә,
Инде пилмән ясап бетә.
Чиста алъяпкыч кигән,
Ап-ак пәрдәләр элгән.
Пычрак сөйми хуҗабикә,
Пөхтәлеккә ни җитә?

Р

Роза була гөлчәчәк,
Ул - патшасы гөлләрнең.
Ә ромашка - акчәчәк,
Бизи урман түрләрен.

С

Сәхнәдә ике җырчы -
Сандугач һәм сыерчык.
Өздереп тә сайрыйлар,
Күңелләргә ярыйлар.

Т

Төн уртасы да җитте.
Төлке авылга китте.
Кетәклектә бикле ишек,
Юк бит бер дә керер тишек.
Ахры, эше уңмастыр,
Тавык ите булмастыр.

У

Ул карчык усал, явыз,
Урманда яши ялгыз.
Озын борыны кәкре,
Аркасы аның бөкре.

Ү

Үләнлектә тора үлчәү.
Бәбкәләрен үлчи үрдәк.
Үсмәгәннәр икән өчәү -
Ашарга, дим, кирәк күбрәк.

Ф

Филләр футбол уйныйлар,
Туп куудан туймыйлар.
Аннан файда бар микән?
Фикереңне әйт, иркәм.

Х

Хоккей уйный хайваннар,
Инде хәлдән тайганнар.
Менә киттеләр кызып -
Карасаң, хәтәр кызык.

Һ

Һөҗүм итте эт һөдһөдкә.
Нәрсә кирәк аннан эткә?
"Һау-һау!"-диеп өрә эт.
Һуштан язды инде һөдһөд.

Ц

Циркта бик күңелле.
Цилиндр кигән абый
Елмаеп безгә карый.
Ул клоун түгелме?

Ч

Чәршәмбе көн чыпчыкка
Чәүкә килде кунакка.
Чәкчәк белән чәй эчтеләр,
Аннан сүзгә күчтеләр.

Ш

Шүрәлене шөпшә чаккан,
Акыра да бакыра.
Шомырт төбенә яткан,
Иптәшләрен чакыра.

Щ

"Борщ яки щи булса,
Һәм тагын итле сумса,
Булам инде канәгать,"-
Дип көлә безнең Тәлгать.

ъ

Ишегендә подъездның
Белдерү язуы бар:
"Итегезче игътибар,
Эте югалды кызның!"

Ы

Ышкы мактана икән:
- Тактаны шома итәм.
Әйткән аңа шунда Пычкы:
- Шапырынма әле, Ышкы,
Шомартканчы тактаны,
Кисәргә кирәк аны!

ь

Төлке Куянга әйтә:
"Пульсыңны үлчик әйдә,
Авыртмыймы соң башың?
Мин бит-шәфкать туташы."
Төлке остара бара,
Рольне яхшы башкара:
"Кирәксә укол куям..."
Ник ышана яшь Куян?

Э

Эт - оста аучы. Кара,
Эз буйлап чабып бара.
Өч кыр үрдәге аткан,
Эшләпәсен югалткан.

Ю

Циркта күрдем юлбарыс.
Менә сиңа тамаша!
Сикерде ул югары
Утлы боҗра аша.

Я

Ялкау түгел ябалак,
Тора азык сагалап.
Төне буе гел ауда,
Ә яктыргач ул ялда.

2002 ел

Фания Фаррахова Тухватуллина   28.08.2017 22:33   •   Заявить о нарушении