Дар яз кlвале

Вафасуздан геж гъавурда акъуна,
Мад жеда вун яргъарай зи сесер кьаз.
Зи ажугъвал мад ви вилиз такуна,
Шадвал амач,сефил я перт гьиссер гваз.

Вун заргар хьиз ава са гевгьер квахьай,
Зи назик рикl къарсур ийиз,тlвар ийиз.
Вун паталди фикир ва жигер квахьай,
Хажалат гуз на,заз,дуьнья дар ийиз.

Гадрайтlани кlанибурун гьасретдай,
Анжах рикlи кlвалахзава заландиз!
Ваз мез авач,захъ галаз хуш суьгьбетдай,
Ялгъуз туна,вун хъфена яландиз.

Гьикьван хьурай залан къванер-туьгьметар,
Заз нубатсуз ви айгьамар герек туш!
Рикl цlразва,эхиз тежез хифетар,
Зи уьмуьр фад цlрадай са цlверекl туш!

Амукьда вун,дар яз кlвале,хуьрени,
Кьарай квахьна,мад ченедал гъил алаз.
Дар жеда ваз гегьенш чуьл,дагъ-дерени,
Гагь синерал,гагь бинедал вил алаз.

Вун аквадай жагъурдач за рекьерни,
Вавди рахай ширин гафар кьит жеда.
Къекъвей рекьер,чун акъвазай муькъверни,
Гьиссер квахьна,вири крар шит жеда.

Са кас амач зи сефилвал кьатlудай,
Зи вилера муьгьуьбатдин нур амач.
Вун акурла,вав рахана,лугьудай,
Кьве гъилелди гатадай къе хур амач...