Мус акъвазда чуьруькар?

Тек тар тахьуй тамани кваз лугьуда,
Йифиз цава гъетер гапlал аквада.
Экв хьайила са гъед сувал алгъада,
Амма рикlин гурп-гурпдин ван хуруда.

Мел-мехъерик жеда гурлу авазар,
Тек тир таран аватай хъен чир жеда.
Кьадар-кьисмет вахтуналди сир жеда,
Гарун хура хъипи пешер-кагъазар.

Алат тийир зал дердерин тагъ хьана,
Чубарук хьиз лув гуз ава муг тахьай.
Дувулрални гужлу бегьем руг тахьай,
Тар хьиз я зун акунач рикl сагъ хьана.

Гьужумдалди къачуз тежер къеле хьиз,
Лугьуда хьи,жугъун галач са ник я.
Хевелаг хьиз,жунгавд кьамал са вик я,
Кар течирда тухуда вич меле хьиз.

Деврандавай цуькведал хар такъурай,
Жаза гурай алчахриз гьакl цавари.
Бегьер тагъуй чпин сала тарари,
Уьмуьр четин,гьаятда хьар тахьурай.

Галатна зун хийирдани-шиирда,
Фейи уьмуьр,жуван рехъ я четинди-
Зи хьран цlай кьунава мад цlивинди,
Туьхуьрдач,за,уф гана ам куькlуьрда!

Куьз герек я и нубатсуз кьуьруькар?
Вучиз чна акъудзава тlурфанар?
Жегьилариз кьисмет тахьуй кафанар!
Каинатда, мус акъвазда чуьруькар?