Иски хуьрер
ХарапIайриз элкъвей муькъвер…
Етим хьанвай гужлу регъвер…
Гум лал хьайи хьран кIвалер…
КIанибуруз тагай гъетер…
Кьагьур хьана шезва вилер,
Аквазвай чи иски хуьрер,
Авахьзавай цлан къванер,
Яваш-яваш уьц1уьз кIвалер.
Амач инра инсан-лежбер,
Къуватар квай зегьмет-гъилер,
Я зуьрне-далдалдамдин ванер
Амач ина къугъваз мехъер…
Килигзава дагъдин къванер,
ЧIалахъ тежез, чуькьвез къуьнер:
- Бес низ гурай ракъини хъвер,
Сефил хьанва дагъдин цуьквер?
Кьакьан цава анжах лекьер,
Абруз къуват гузвай цифер,
Ва бубайрин язух руьгьвер:
- Хайи чил хуьх!- гузвай эвер.
Умудар кваз тек са рекьер,
Лап яргъарал вегьез вилер:
Жа(е)гъидатIа викIегь рик1ер,
Чи тарихдин хуьдай гелер!?
Яраб гьа ик1 пуч жеда жал,
Экъеч1на хъач, къацу векьер?
Мусал сефил килигда жал
КIани рушаз тагай цуьквер?
фото из Интернета
Иски хуьрер
© Copyright: Гасанова Гюзеля, 2017
Свидетельство о публикации №117080903000
Свидетельство о публикации №117080903000
Рецензии