Гёз алдыма гельди элим...

Минглер йыллар алда болгъан
Тарихлери элимни--
Гюржююрт, Сотай, Варачан--
Гёз алдыма гелинди.

Гёз алдыма гельди асгер
Къумукъ тюзню якълайгъан.
Гёз алдыма гельди халкъы,
Гючлюкге гюч къаплайгъан.

Гёз алдыма гельди къойчу
Сиривюн къувалайгъан.
Гёз алдыма гельди Йырчы
Къумукъ тюзню йырлайгъан.

Бир аз заманны ичинде
Нече тюрлю ой гельди.
Давда къалгъан къумукъ яшлар
Тизильген кюйде гельди.
Къол сильлеп, оьтюп гетдилер,
Къарай туруп якъ якъгъа.
Тавуш гельди : " Уьстюнлюкге ес болмагъа
Барайыкъ , гьали, алгъа!"

Ойлар, ойлар, гьар келпетлер
Гельди мени алдыма.
Къарама сюйген йимиклер
Мени, гьали, гьалыма.

"Гьей, юрюгюз, гетме тарыкъ! "--
Деген тавуш чалынды.
Ёлдашларым гетип бара....
Ойлар буса - къалынды.

Тек къайтгъанда уьйге ойлар
Хоталады башымны.
Ойлай туруп оьтген гюнню
Унутдум мен ашымны.

Тек юрегим оьктем болду
Мени къумукъ тюзюмден!
Бар болгъур сен,КЪУМУКЪ ТЮЗЮМ,
Дюньяланы юзюнде!