Тха къам

(назам)

Iел йийша уж замаш хьайна теш ва йолаш,
Дунена йоаккхонаш маьхаца ва юсташ,
Хьадоагlа хьо, тха къам, нийсона хам гойташ,
Безабеш дикан чам, халонна ка ца еш.

Дахалда хьо, тха къам, вахарца гIа боахаш.
Декалда хьа илли, тха дегаш гIоздоахаш.

Iаьржа морх тIа ярах, маьлха лир ца дойташ,
Балано озарах, вахара мах хойташ,
Дах хьо, кхыча къамашца машаре ва долаш,
Халонна, аттонна массарца юкъдолаш.

Дахалда хьо, тха къам, вахарца гIа боахаш.
Декалда хьа илли, тха дегаш гIоздоахаш.

Хьай кхоане Iалашъеш – тIехьенаш хьалкхееш,
Хьаьнадар хестадеш, фаьрадар дебадеш,
Беркате дахаш да, хьамсара хьо, тха къам.
Хьоха тхоаш хиларах бу оаха боккха хам.

Дахалда хьо, тха къам, вахарца гIа боахаш.
Декалда хьа илли, тха дегаш гIоздоахаш.

Ер дуне мелла дах, хьо, тха къам, дахалда.
Ер лоамаш мелла латт, хьа гIала латтийла.
Дахалда ноахалаш, хьа наькъ тIа гIабоахаш,
Яхийла тIехьенаш, хьа сийле хьалкхоабаш.

Дахалда хьо, тха къам, вахарца гIа боахаш.
Декалда хьа илли, тха дегаш гIоздоахаш.

30.06.17.