Виридалайни шад рехъ

 Гьазур я зун к1вачин хьанва
Физ бахтлу рекьиз.
Виридалайни к1ени рехъ, зун
Хутахдай к1вализ.

А рекьин кьве къерехдани
Экъеч1на цуьквер
Алгъузна кьил , икрам ийиз ,
Заз гузва эвер.

Рекъинин ранг алай хъипи
Цуьквер , хуш рик1из.
Безетмишна яргъи рекьер
 Хъфидай к1вализ.

 Ашкъи кутаз гзаф гъизва
Хуш гафар рик1ел.
Салам гана , кам вегь лугьуз
Ватандин чилел.

Ингье рекье гьатнава зун ,
Лув гузва цавай.
Шадвиляй жув секинариз
 Жезмач мад завай.


Килигзава зун цаварай
Ватандин чилиз.
 Ифрягь чилер, ч1ехи дагълар
Лап хуш я рик1из.


Гекъиг жезвач
 Зи Ватандин гуьрчегвал завай
Са куьнуьхъни. Багъ женнетдин ,
Дуьньяда авай.

Салам гана вегьейла кам
Дагъдин чилерал.
Шадвилин накъвари кьуьлнай ,
 Мад зин вилерал.

Аватна зи къуькъвел ст1ал
Хуьз тахьай сабур.
Зи пак дагълар зун ви руш я
На ч1ехи авур!


Мад хтанва зун кьил ч1угваз
Ви гуьруьшрал къе.
 Инсан я зун , вин к1енивал
Гьатнавай рик1е!