Жангы китап

Сюймекликни, кертиликни эмда тюзлюкню багъалай

Бу кюнледе малкъар адабтятыбызгъа жангы назму жыйымдыкъ китап къошулгъанды - «Атламла». Аны автору Байтуугъанланы Расулну жашы Исмаилды. Ол 1999 жылда 18-чи декабрьде Тебен Чегем элде туугъанды. Аны назмулары "Минги-Тау", "Нюр" журналлада эм Къабарты-Малкъарны "Заман", "Советская молодёжь", "Чегем аузу" деген газетледе да басмаланнгандыла.
«Атламла» деген назму жыйымдыгъы уа авторну тунгуч китабыды. Анга кирген тизгинледе ол Миллетине сюймекликни, кертиликни, тюзлюкню неден да бек багъалагъаны сезилип турады. Аны чыгъармаларыны атлары кеслери окъуна кёргюзтедиле: «Чегемим», «Ичи кюйюп барады», «Къарачай-Малкъарым», «Толгъан ай», «Разият», "Назму тизген Сакинат"…
Китап «Ахшы жолгъа бар» деген ариу сёзледен Къабарты-Малкъар Республиканы сыйлы журналисти, КъМР-ни Журналистлерини Союзуну председателини орунбасары Шауаланы Разият башлайды.
Жашауну, адамланы араларында халланы юслеринден сагъыш этдирген бир къауум тизгин:

Жангыз кюнмю жашайды адам?!
Бюгюн мен, там бла сен абынсанг,
Биргелик къутхарлыкъды баям,
Къатынгда шуёхунг табылса.

Исмаил къарындашыбыз назму тизгинлерин эрттеден бери жазады, алай, ийменип, басмаларгъа ашыкъмай тургъанды. Китап этип чыгъарыргъа аны поэт - Мусукаланы Сакинат бла КъМР-ни Журналистлерини Союзуну председателини орунбасары Шауаланы Разият таукеллендиргендиле.

2016 ж.