Элкъуьрунар

 Адил:

Къе булахдал фенавай зун Северин,
Кlан хьана заз Марьямазни эверин.
Кичlе хьана,хъел атана эх тежен,
Яргъаравай,азаб гудай рекьерин.

 Марьям:

Вуч авуна на булахдал Северин?
Фейибуру тада гелер кlвачерин!
Хъел къведани эверналди булахдал?!
Яваш фида,атlуз мензил рекьерин!

 Адил:

Ша булахдал чи сувавай Северин,
За векь ягъин,на килига мелерин.
Кlан хьайитlа,гъил вегьена цуьк къачу,
Гьайиф къвезва заз ви лацу гъилерин!

 Марьям:

На векь ягъа булахдалай Северин,
Гьайиф къвемир ваз зи лацу гъилерин.
Мал-мехъерни кlан я рикlиз виридан!
Гелер тада за булахдал кlвачерин !

 Адил:

Ша булахдал чи сувавай Северин,
Шиш гун за ваз туртур,катран,свелерин.
Чуьнуьхармир,ранг акурай виридаз,
Иервиляй яру хьанвай хъуьхъверин.

 Марьям:

Атайла зун а булахдал Северин,
Къалурдани яру ранг за хъуьхъверин.
Катра,вичин ахъайда лув гуьрчегдиз,
Гьикl неда за а шиш туртур,къветерин?

 Адил:

Ша булахдал чи сувавай Северин,
Килига кван кlвалахариз лекьерин.
Лацу румка гъиле аваз акурла,
Пехилвиляй къваларив гвай пехъерин.

 Марьям:

Атайла зун а булахдал Северин,
Лув гуз жеда лужар цава лиферин.
Акурай заз цава нур гуз гъетерни,
Румка тахьуй гъиле викlегь лекьерин.

 Адил:

Ша булахдал чи сувавай Северин,
Акурай заз иервал ви киферин.
Вири дустар а булахдал кlватl жеда,
Шагьидвилел ша чна чаз мехъерин.

 Марьям:

Атайла зун а булахдал Северин,
Бешме жеда винел яргъи киферин!
Бес гьикl хьурай,Адилан,гьал къенин къуз?
Авунвани савда-чара мехъерин ?