Шииратдин легьзеяр

АЯЛАР

Сад акурла, муькуьд тефир рикIелай,
Гьикьван гуьрчег аялар я, аялар?
Кам янавай мекьи хъуьтIуьн цикIелай,
Цуьквер хьтин хиялар я, хиялар!

Къуй абурун кьиле фирай мурадар,
Диде, буба кьилел алаз гьамиша.
Гуьрчегзавай чи уьмуьрдин парадар,
Эй, Сад Аллагь! Абуруз бахт багъиша!

Белки заз кьван кIандай кас жеч бицIекар,
ИкI лугьуда чна, гьелбет, вирида.
Гуьрчег хьунухь патал, ийиз пичIекар,
Аялриз це, кьве пад тунвай гъерида.

Агъзур жуьре къенфетрилай ширин тир,
ТIебиатдин няметар це аялриз!
КIел-кхьина, чирвал авай дерин тир,
Камаллубур хьун паталди хиялриз.

ТIебиатдив къведай гьич са затI авач,
Бизнесменрихъ ийиз жезмач ихтибар.
Булахдилай кифетлу мад яд авач,
Ам виртIедив, гъеридив я барабар!

Аялрилай чаз багьа тир вуж ава?
Гьабур патал тушни гьар къан зегьметар?
Диде-буба патал тек са гуж ава,
Югъ-къандивай хкаж жезва къиметар!

ГьакI ятIани аялриз чун чанарни,
Гуз гьазур я, куьз лагьайтIа, рикIер я.
Абур чи бахт, я гьар йикъан гьунарни,
Чи тарарин бегьер гъизвай цуьквер я!

ИкI лагьайла, Сажидиназ кIаниди,
Шад хъвер хьун я чи аялрин сиверал.
Чахъ гьар садахъ гьар са хиял къениди,
Жен, ислягьвал хуьз цаварал, чилерал!

ДИДЕЯР
Дидеяр чаз гьардаз авай сад я, сад,
Гьа кардалди зун гьамиша шад я, шад.
Диде - кIватIна, куьтягь тежер гад я, гад,
Чун гьарма сад са дидедин бегьер я!

Дидейри чаз экуь дуьнья багъишна,
Къелемар хьиз, бегьер гъидай, битмишна.
Дидейри чаз вири уьмуьр алхишна,
Чун гьабурун гьар экуьнин сегьер я!

Дидейрикай мани лугьуз кIанда заз.
Пайдахар хьиз, кьуна, тухуз кIанда заз.
Зерре такьат амай кьадар чанда заз,
Жув дидеди хайи тир хуьр шегьер я!

Дуьнья ислягь, авай хатур гьуьрметар,
Чи дидейри я чIугвазвай зегьметар.
Са стхаяр хьунухь вири миллетар,
Чи дидейриз пара кIани тегьер я!

СУЛЕЙМАННИ ДЖАМБУЛ

Сад Сулейман кьакьан Кавказ дагъларай,
Ван хкажай шаир совет властдин.
Сад Джамбуль, Азиядин яргъарай,
Ван хкажай акын хци алмасдин.
Абур кьве кас хьанай эвел кьилерин,
Векилар яз зегьметчи тир эллерин!

Кьве шаирни эвел кьиляй кесиб яз,
Са шад тир югъ акун тавур ксар тир.
Совет власть кьисметдай хьиз несиб я.
Совет власть тестикь хьайи йисар тир.

Чеб чпивай яргъал тиртIан мензилриз,
Кьведанни сад тир мурадар, хиялар.
Руьгьламишиз, азиятар кьезилриз,
Кьведазни хуш тир советрин аялар.

Чан аламаз акуначтIан сад садаз,
РикIяй рикIиз рекьер авай шаиррин.
Залум ажал кьисмет хьана фад садаз,
ЦIарар амаз аламатдин загьиррин.


ШАЛУНИН ГЬАЙБАТ

Уьмуьр ахьтин са затI я хьи, дуьньядал
Яшамиш хьун, кьуьл туширди демера.
Бязи чIавуз кар алачиз арадал,
Чи жегьилар чуьруьк жеда кимера.

Лезгияр я, пис гаф къачун тийидай,
Туьнт ксар яз, фад хъел къведай, къилихрин.
Хуьн тавуртIа намус, кьадай кьейидай,
Эх тийидай са кIвалахни синихрин.

ГьикI ятIани, кьве жегьилдиз тек са руш,
КIан жеда кьван, чпиз тушиз гьич хабар.
Руш, лагьайтIа, тир женнетдин мелек къуш,
Вичиз ухшар кас авачир барабар.

Гьарда вичин тариф ийиз кIанидан,
Ихтилатар ийиз, хуьквез, рекьевай.
Руш лагьайтIа, гъил кьуна хьиз хайидан,
Чпин багъда, цуьквер ат1уз векьевай.

Амма рушаз чизвачир вич кьве касдиз,
КIанзавайди, кьуьлернайтIан демера.
Руша вичин намус хуьзвай лап хъасдиз,
Гьам булахдин рекье-хвала, кимера.

Жегьилар я, ацIурнавай туьфенгар,
Кьуркьушумдин гуьлле авай луьлейра.
Бязибурун кьилера жез йифен гар,
Акьул балугъ хьун тавунвай келлейра.

ГьикI ятIани хабар жеда кьведазни,
КIанзавайди и гуьрчег руш хуьревай.
Бушвал авун кутугнавач садазни,
Кьведни чуьруьк ийиз, вацIун кьеревай.

Кьведавни гвай кьве пад хци гапурар,
Ишлемишдай, меслят тахьай арада.
Авахьна хьиз арабадин дапурар,
Лаш турди хьиз, акIидайди кьарада.

Гьарай-вургьай акъатайла ванерин,
Жегьил рушаз аквада и жегьилар.
Гапурри ван ийизвай хьиз къванерин,
Кьве жегьилди хазва чпин гуьгьуьлар.

Халкь кIватI хьанвай, амма абур кикIизвай,
Акъваз лагьай ванни текъвез япариз.
Гагь сад, гагь сад абур кIеве акIизвай,
Ябни тагуз шеларзавай папариз.

ВикIегь руша, галудна шал кьилихъай,
Кьве гапурдин гадарай чIавуз арадиз;
Кьил ачухна, регъуь хьана вичихъай,
Гуя намус аватай хьиз кьарадиз.

Дишегьлийрай акъат хьана гьараяр,
Эркекбурун гъилер фена гапурдал.
И гьал акур чуьруьк жезвай гадаяр,
Секин хьана, рахада кьван сабурдал.

Кьведа кьве пIипI кьуна шалдин чилеллай,
Галчукиз тун хъувуна, кьил кIевириз.
Гъил къачуна инал чпи чпелай,
Кьинер кьуна, тевгьин патал кIевериз.

Гъил къачуна, а рушалай кьведани,
Чеб ажалдин акъуд авур къармахрай?
Ихьтин кьегьел рушав масад къведани?
Жегьилрив чеб кьаз тун тавур ахмакьрай.

Сажидиназ и кьаса фад ван хьана,
Дишегьлидин гьайбатлу тир шалдикай.
Рушакай квез суьгьбет ийиз кIан хьана,
Меслят авур кьве жегьилдин къалдикай.
 
ПЕХИЛ ДУСТАРИЗ

Пехил дустар авачиртIа, рикI тIардай,
Яраб чи гьал гьикI жедайтIа, сефил яз?
Алакьдайни экъечI ийиз и дардай?
Сад-кьвед кьванни хьаначиртIа пехил яз.

Чанар сагърай зи пехил тир дустарин,
Зав кIвалахиз тазвай жуван кьилелди.
Зун иеси хьун патал зи къастарин,
Алахъзава закай рахаз хъилелди.

Гьар са касдиз Аллагьди са пай гана,
Ламразни вич кIандайни кьван лам хьана?
Садаз рикIе хкахь тийир цIай гана,
Са масадаз пехилвилин гъам хьана.

ИНСАНДИН КЬИНИКЬ

Инсандин кьиникь япун кIанелла,-
Лугьуз ван хьанай, хьаначир чIалахъ.
Малаикарни кьвед кьве къуьнелла,
Азраилни кваз гала ви къвалахъ.

ИкI фена уьмуьр, вацIуз атай сел,
Яд татайди хьиз, кьер акваз кьуру.
Сад рекьиз, кьвед хаз, артух жезва эл,
Инсанар жезва уьмуьрдал кьару.

Гзаф чими тир югъ тир рагъ авай,
ЧIехи шаирдин юбилей-сувар.
Музейдихъ къацу еке багъ авай,
Кьуд патахъ вичин ахъайна лувар.

Чун жуван къадир течир ксар я,
КIвачел хьайитIа, кьилел затI тежер.
Уьмуьрни жуван гзаф йисар я,
Веревирдна хьиз, санал кIватI тежер.

Ракъини вичин ийизва кIвалах,
На лугьунда цIай къурзава цавай.
Беден буш хьунин жезвач зун чIалах,
КIвачел акъвазиз хъижезмач завай.

Явашдиз чилел хьайила экIяй,
Патав гвайбуру къачуна басрух.
Духтур атана, лиф хьтин цавай,
Хилен седефар авуна ачух.

Давление зи аватна кIанел,
Дамардиз тадиз асухна са раб.
Кьве касдин гъилер алай зи къуьнел,
Рекьида лугьуз Сажидин яраб?

Кьведа хъуьчIеркай кьуна, тухвана,
"Тади куьмекдин" машинда аваз.
Жув жувахъ галаз туьнт яз рахана,
Кьилиз рагъ гуз и яшинда аваз.

Юбилейдин югъ шад тухвай кьиле,
Кьисметна сефилвилелди тухун.
Яру хьанвай чIар алачир келле,
Буш хьанвай беден, гьакIани яхун.

Аллагьдиз шукур, амукьайди сагъ,
Жуван хъсанвал атана вилик.
Тамашзава заз са виляй хьиз рагъ,
КIус амай кутун тавуна чилик!

Белки эллерин дуьайри хийир,
Къутармишна зун ажалдин гъиляй.
Квез бахшзава за, эллер, и шиир,
Зал гъалиб тахьай ажалдин хъиляй!

ИКРАМ ИЙИН ИКРАМАЗ

Лезгийрин тIвар хкаж ийиз цавариз,
Чи гьар са югъ элкъуьрзавай сувариз,
Къизил медаль кьаз хас хьанвай лувариз,
Ша, лезгияр, икрам ийин Икрамаз!

Баркаллаяр гъайибур чахъ мад ава,
Гьар кьегьалдин и дуьньяда ад ава.
Халкьдин вилик и кьадардин шад авай,
Ша, лезгияр, икрам ийин Икрамаз!

Лезгияр чи Шарвилидлай эгечIна,
ТIурфанрин цIай лигим хьана экъечIна.
Лезгинкадин кьуьлуьк шад яз экечIна,
Ша, лезгияр, икрам ийин Икрамаз!

Сажидинан буржи гьар са жегьилдин,
Тариф авун я, шад авур гуьгьуьлдин.
Медал хурал алаз хтай къизилдин,
Ша, лезгияр, икрам ийин Икрамаз!


Дуьньяда затI авач метлеб авачир,
Лугьумир хьи и затI –ам квез герек я?
Мумкин я, ваз гьадани, тум галачир,
Лугьун, акур чIавуз, им квен хуьрек я?
+++

ЯШАМИШ ЖЕЗ КIАН ЯТIА

Алуд жуван яшарни кваз рикIелай,
Яшамиш жез кIан ятIа квез яргъалди.
Куьлуь-шуьлуь ийин тийз гъилелай,
Шадвилиз хьухь, жезмай кьадар мукьвалди.

Нефес къачуз цуькверикай атирдин,
Инсанар жен гьар декьикьа къадирдин,
Манийриз яб гуз, шиирриз шаирдин,
Садвилиз хьухь, жезмай кьадар мукьвалди.

Сабурлувал хуьз алахъ куьн гьар чIавуз,
Кьил хкажна, тамаш ая вун цавуз.
Яшамиш хьун, куьтягьун я мад са ВУЗ,
Гадвилиз хьухь, жезмай кьадар мукьвалди!

ЖАМИЛИЯ

Шабалутдин, къизилгуьлдин зар алай,
Вич муаллим тарсар гузвай кар ялай,
Вичел, гьейран жедай гуьзел тIвар алай,
Кьианжуван руш яни вун, Жамиля?

Артух тариф авуна хьуй, хъел къведай,
Цава тIурфан СтIал вацIуз сел къведай.
Мумкин я захъ галаз кикIиз эл къведай,
Кьианжуван руш яни вун, Жамиля?

Аллагь патал Сажидина туькIуьрай,
Шиирдикай лампа хьурай куькIуьрай.
Пехил ксар кIамай кьадар луькIуьрай,
Кьианжуван руш яни вун, Жамиля?


ХАТУР АЯ

Хатур авур касдин хурал хер жеда,-
Ваз адакай багьнаяр кьаз кIан жемир.
Яд авачир вацI – кьуру тир кьер жеда,
Я вакайни кIеви вили къван жемир.

Чир тахьайтIа, вуна авур хатурар,
Кьилел Аллагь ала, Гьадаз чир жеда.
АлахъайтIа, вуж вичел гъиз абурар,
Хийир дуьа аваз, гьа кас пIир жеда.

И дуьньядал, чун амачир вахтуна,
Амукьдайди я писвални хъсанвал.
Пачагьдилай авай кьакьан тахтуна,
Багьа тир затI я анжах са инсанвал.

Жуваз дарвал гун тавуна, чарадаз
Хийир гунуг, кьиле тефир кIвалах я.
КIанзаватIа, мурадар гъиз арадиз,
Хъсанвал - яд акьалтI тийир булах я.

Хъсанвилив къведай гьич са кар авач.
Ам Аллагьди вак кутур пак лишан я.
Инсанвилив къведай багьа тIвар авач,
Багьа къван хьиз, шумудни са къашан я.

Сажидиназ кьудкъадни кьуд яш хьайи,
Такур жуьре инсан авач къилихриз.
Гишиндакай хабарар яхъ каш хьайи,
Хатур ая, яб тагана синихриз!

РУШАН ГУЬЗЕЛВАЛ ВУЧ Я

Рагъ акьувай къизилгуьлдин цуьк ятIа?
Я тахьайтIа, дидед хура рикI ятIа?
Яраб жагъай дидедин гьал гьикI ятIа?
ЦIараз, кIуьрез кичIез ава, Хадижа!

Таз къелем тир бегьерлу тир багъдавай,
Камаллу руш, буйни дамах-чагъдавай.
Сес ширин тир, булахдин хьиз дагъдавай,
Гзаф хъуьрез кичIез ава, Хадижа!

Эминхуьре, мел-мехъеррин ашарин,
ЧIулав вилер авай руьгьдин къашарин,
Пара тариф авур чIавуз рушарин,
Мадни серес жез кичIезва, Хадижа!

ШИРИНВАЛ  ВУЧ ТИР ВИ ВАНЦИН

Яб гана за интернетдай манийриз,
Тамамарай «Ты супердин!» тIвар алай.
Гьар са нота гъана вуна вири дуьз,
Ракъинал хьиз бес кьадардин зар алай,
Ширинвал вуч тир, Карина, ви ванцин?

Буйдиз шуман, юкь тир закIал, чIулав тир
Вилеринди рикIин ашкъи ялав тир,
ЧIарари ви ийизвайди сирнав тир,
Ширинвал вуч тир, Карина, ви ванцин?

Зал къарагъна, капар ягъиз, шад хьайи,
ИкI гьейранар авурди вун сад хьайи,
Кьуд уьлкведа машгьур авур ад хьайи,
Ширинвал вуч тир, Карина, ви ванцин?

Сажидина, лезги шаир, стIалви,
Тариф ийиз гьазур я къе патал ви.
Чаз хуш хьайи шад манийрин кIватIал ви,
Ширинвал вуч тир, Карина, ви ванцин?

ФИЗВАТIА КУЬН АХВАРАЛ

Диде лагьай тIвар акьалтай чIавалай,
Рагъ, варз кими тежедай хьиз цавалай,
Садра кьванни алатна жув жувалай,
ФизватIа куьн, чан дидеяр, ахварал?

Гъуьлуьн, кIвалин залан буржар хивеваз,
Дуланажагъ кьиле тухуз,  кIевеваз,
КьепIин кьилихъ, лайлай мани сивеваз,
ФизватIа куьн, чан дидеяр, ахварал?

Гьина велед аватIани чир ийиз,
Гьар жуьредин дуьшуьшрикай сир ийиз,
Мурадрикай, хиялрикай къир ийиз,
ФизватIа куьн, чан дидеяр, ахварал?

Дидеяр чаз уьмуьр бахшай ксар яз,
Дидеяр чи даим жегьил сусар яз.
Чаз акьурар яз гайибур тарсар яз,
ФизватIа куьн, чан дидеяр, ахварал?

Дидеяр - гьич ксар туштIан рекьидай,
Гъетер я чаз цаварилай жагъидай.
Вахт авачир, чеб патал кар ийидай,
ФизватIа куьн, чан дидеяр, ахварал?

БАРКАЛЛА ЧИ ТАГИРАЗ

Ни лугьуда, лезгияр чи лекьер туш?
Дагъларилай кьакьанрани лув гудай.
ВикIегьбуруз, цаварни кваз рекьер туш?
Четинвилер алуд ийиз, цIув гудай!

Чи генерал майор Тагир Гьажиев,
Цавун кард яз, хтанва къе Ватандиз.
Чи лезги хва, аферин ваз, баркалла,
Икьван багьа шадвал гъайи хизандиз!

Чир хьурай хьи, лезгияр чи лекьер я,
Вердишбур я муьтIуьгъ ийиз цаварни.
Чаз кIанибур рикIяй-рикIиз рекьер я,
Дуьньяд винел ислягьвални суварни!

На Сажидин, хкаж жуван сес цавуз,
Вирибуруз ван жедайвал шадвилин!
Чир хьурай хьи, чи лезгияр гьар чIавуз,
Шагьидар я вири халкьдин садвилин!

САГЪРАЙ КЕРИМОВ

Лезги миллетдин дамахни даях,
Шарвили ухшар хваяр ава чахъ.
Камалдиз дерин, гьуьрметдиз къучагъ,
Сагърай Керимов Сулейман стха!

Хиве кьур кIвалах акъуддай кьилиз,
Экв я ам акур халкьдин кьве вилиз.
Гьуьрмет ийизвай диде тир чилиз,
Сагърай Керимов Сулейман стха!

Шумудни садан туькIуьрай кIвалах,
Гьуьрметлувилин я Земзем булах.
Къадим тир лезги халкь галай къвалахъ,
Сагърай Керимов Сулейман стха!

Гъил ахъа касдиз пара хьуй девлет.
Куьн хьтинбурал уьзяй я миллет.
Баркаллу деде-бубадин велед,
Сагърай Керимов Сулейман стха!

Зун лезги шаир, Сажидин я тIвар,
Шииратдин сир чирзавай устIар.
Дуьньяда авай вафалу дустар,
Сагърай Керимов Сулейман стха!

СЕЛМИНАЗ
КIандат1а хьурай кIвале, вичиз къурбатда,
Мани лугьуз, кьуьл ийиз са бубатда,
Кьиле тухуз, вичел атай нубатда,
Сагъ хьурай вун, чи лезги руш, Сельминаз!

МАИНА ВАХАЗ
И Фейсбук квез мубарак,
Шад хабарар гваз атурай.
Ацукьна хьиз хатрут тарак,
Лимон квай чай хъваз атурай!

ЗАМИРАДИЗ
Рушарикай иер, гуьзел, гуьрчегди,
Тек са вун я, тек са вун я, Замира.
Вахъ къени рикI, гафарни я керчекди,
Амай крар гьич на рикIив, кьа ми ра!

КЬИСМЕТ

РикIел акьалтиз алатай йисар,
За жуван рикIиз гузва къе майдан.
Пис инсанри ваз гуз чIуру тарсар,
Кьурдай кьаз хьанай мад за ви гардан.

Гьа виляй вун зи амазма рикIе,
РикI алаз кьур, яр, са шумуд йисуз.
Вун бубу хьанва, чарадан никIе,
Завай жезвач, яр, секиндиз кусуз.

Ви чIулав чIарар, ви седеф сарар,
Караг ийизва мад зи вилеркай.
За кхьей чIалар, рекье тур чарар,
Я цавай фена, я чилерикай.

Зазни чизвай, ваз зун тирди кIани,
Амма адетри чаз яна галтIам.
Гьикьван фикирар тиртIани къени,
Виликди къачуз вуганач къадам.

Кьисметри чун кьвед акъудна яргъаз,
Ви шикил акъуд жезвач зи рикIяй.
Низ акуртIани зун хъуьрез, къугъваз,
Бубу акъудиз хьанач хьи никIяй.

Ара-бир заз вун акваз ахварай,
Рахаз алахъна, мез жезва кIарас.
За, вун акурла, амачиз кьарай,
Хажалатрикай гам ава храз.

Кесиб Сажиндин, пай атIанвай кас,
Муьгьуьббат аваз, яр жагъун тавур.
Сараривди мез квез я авун кIас?
Кьисмет гафунихъ гьич агъун тавур.

ШАХРИЗОДА РУШ

ЧIулав чIарарин,
Седеф сарарин,
Хъуькъвен кьилерни
Экуьн ярарин
Шахризода руш.

Узбек миллетдин,
Ташкент адетдин,
Пел агъ газетдин,
Ашкъи лезетдин,
Шахризода руш.

Муьгьуьббат бегьер,
Пакаман сегьер,
Гуьзел тир тегьер
Ташкент тир шегьер,
Шахризода руш.

Сажидин шаир,
Гафариз магьир,
Вун ийиз загьир,
Багъиш я шиир,
Шахризода руш!

===
Салам алейк Гьажи стха,
Вил хьанва вахъ, гъвеч1и стха.
Амач фадлай салам, калам,
И кардал мягьтел я алам.
Хъсан гафар лугьун патал шиирдал,
Шаирвилин кIанда, дуст кас, алакьун.
Фикир цIалцIам лугьун патал эхирдал,
КIанда илгьам ва са кьадардин алахъун.

Дишегьлияр халкь авунва дуьньядал,
Инсаният артух  авун паталди.
Кьилел са кар гъиз тахьайла арадал.
Ахмакь кар я, ийиз кIан хьун гъуталди!

ГЪАЛИБВИЛИН СУВАР Я

Шадвилерни ава гьар са жуьредин,
Вири халкьди санал кьиле тухудай.
Са вил хъуьрез, са вил шедай бередин;
Гьуьлерални, цава, чиле тухудай,
Им шадвални шел какахьай сувар я!
Эхна, эхна, хъел какахьай сувар я!

Секин яз, фу нез тунач чав душманди,
Эркекар – цIуз, амай халкьдиз каш гайи;
Шадвилеркай авуна чаз пашманди.
Шегьерарни хуьрер, кIвалер, хаш кайи,
Им шадвални шел какахьай сувар я!
Чи шириндак кьел какахьай сувар я!

Яргъал фенач, ягъунарни кьиникьар,
Кьуд йисалай артух хьана вахтарни.
Душман вичин магъарада гиликьар
Авун патал, багъишай чаз бахтарни,
Им шадвални шел какахьай сувар я!
Гъалибвилин сел какахьай сувар я!

Чир хьурай чун – халис ватандашар я!
Гьулданар тир лигим хьанвай цIаяра.
Ислягь халкьар вири чи юлдашар я,
Яру пайдах даим авай цавара,
Им шадвални шел какахьай сувар я!
Им мехъерни мел какахьай сувар я!

ГЕОРГИЕВАН ЛЕНТА

Георгиеван лента –алкIура хурал,
Яру Гъед хьиз вад пипIен, женгера лигим!
Абур кьейи солдатрин эцига сурал,
Гьар сад вичин кьисметдин хьанвай са аким!

А лентера цIайни гум ава дявейрин,
Экъичнавай ивияр чи Ватан патал!
А лентера кьуранва накъвар дидейрин,
Азад совет инсанрин гьар са чан патал!

Къуй куьн хурал нур гурай гьар са лентини,
Рекьин тийир полкарин рикIел хуьз тIварар!
ЦIайни гум такун патал, мад чаз женгинин,
Гъалибвилин экверин чукIурин Ярар!

Рекьин тийир полкарин веледар я чун,
Гергиеван лентер алай хурарал!
Акьалтзавай несилрин игитар я чун,
Дамахзавай бубайрин пак тир тIварарал!

Георгиеван лентер – ранг яру, чIулав,
Экъичнавай иви я, цай, гум квай ялав!
Алудмир куьн рикIелай гайибур чанар!
Ватан хуьдай чахъ ава игитрин гьунар
БУБАДИН ТАРСАР

Са бязибур ава пехил инсанар,
РикI цIаранвай халидин хьиз салавай.
КIанзавачтIа хьана вакни нукьсанар,
Физ кIан жемир гьич абурун къвалавай.

Тамашайла инсанар хьиз аквада,
Къене бомба авай ПРО ракетар.
Чакъалриз чеб асланар аквада,
Абурухъ кIан жемир ийиз гьуьжетар.

Халкьди тариф авуртIани, гьа вун я.
Жув хуьз алахъ вири хьтин инсан яз.
КIанзавайди чIуру кIвалах тавун я,
Амукьдайвал вун рикIерал хъсан яз.

Тапан тариф, фитне я ам ийизвай.
Хкажналди цавуз, вакай лекь жедач.
КIвалахунал, гуж гана хьиз, тийизвай,
Беден гатун цикIизни кваз гьекь жедач.

Садрани кIан жемир ийиз дамахар,
Ви буржи я вафалу хьун ватандиз.
Келледа гар авайбур я ахмакьар,
Эгер чпи фагьумайтIа хъсандиз!

Зи хва ятIа, лезги лугьур тIвар алай,
Гьуьрмет ая халкьдиз чандал цIай кана.
Вакай инсан хьун паталди кар алай,
Сад Аллагьдин халкьнава вун пай гана.

ЯРАБ
ТупIал шаир хьун туш акьван зиян,
Эгер агъудив ацIанвачтIа рикI.
КицIинни тариф ийиз, хъваз, пиян
Жедалди, чакъал, нитIре кьунвай сикI.

Вичи вич кьуна шаирдай еке,
КIусни кьел квачир туькIуьриз бейтер;
Гъуьлягъдин агъу чуьнуьхиз рикIе,
КIвалахар ийиз вердиш кас бетер!

Къуй Сад Аллагьди авурай дуван,
Пехил тир рикIер хуравайбурун!
Кьве кIвачел къекъвез вердиш тир гьайван,
Са кьил фад кьена, суравайбурун!

КутугнавачтIан Сажидиназ агь,
Чпи крарал ийизва тIалаб.
Халкьдин арада, авачирбур ягь,
КъекъвезватIа, кьил хкажна яраб?
САМУР ТАМА

Самур тама цIай кьунвалда, куьз ятIа?
Белки адак цIай кягънатIа хъилелди.
Лугьуз жедач, кIанзамач жал хуьз ятIа?
Писвал ийиз лезгийриз кьве гъилелди.
Яд бес тежез Самурдин там кузва чи!
Азиятар гьар къуз рикIиз гузва чи!

Дагълар чибур, вацIар чибур, там чиди,
Яд тарашиз вацIаралайни чиликай.
Кеф садбуруз, хажалатни гъам чиди,
Кьулухъай къвез, къекъечI лугьуз виликай,
Ракъини къвез, далуни кьам кузва чи!
Аллагьдини, хъиляй, рекьиз гузва чун!

ЗУН ШАД Я

Зун шад я вал, вун заз кьисмет тахьунал,
Чун яргъалай аквазва кьан гьар юкъуз.
Зун ашукь тир вахъ галаз хуш рахунал,
Гьайиф ятIан, чара касди яр тухуз.

Ажеб хьана, чун чаз кьисмет тахьана,
Белки завай ви кефияр хун жедай.
Ажеб хьана, чара касди тухвана,
Чи муьгьуьббат, дередикай хун жедай.

Амма рикIиз вичин чIал я чидайди,
Акъуд жезвач, рикIе гьатна, цаз хьана.
Гьикьван кIани яр ятIани гъидайди,
Амма зи рикI тек вун патал тIаз хьана.

Ажеб хьана лугьузватIан меци зи,
РикIи вахъди чIугвазва зун, ракь хьтин.
Вахъ галтугиз, кIвачер хьана кьуцIи зи,
Ви кIанивал амазма захъ накь хьтин.

Зун шад я вал, пашман ятIан рикIивай.
Вунни, заз чиз, хьайи кардал рази туш.
Яргъаз тежен муьгьуьббатдин рекьивай,
Я вунни туш, зунни акьван кьузуь туш.

ГЬИКЬВАН ГУЖ Я
Фяле хьурай, лежбер хьурай, чубан хьуй,
Къуй гьар са кас пешекар яз кIубан хьуй.
Гьикьван гуж я шаир хьун куь арада?
Захъ гьи жуьре аватIани къенивал,
Ийиз тежез вирибуруз кIанивал,
Зал, шумуд кас алахъна, тваз кьарада?!
Виридан кьил – са чантада, амма зи
Кьил са маса чантада тваз, сив кIеви,
Гьикьван гуж я шаир хьун куь арада?
Халкьдин патай авай чIавуз гьуьрметар,
Пехил ксар, ийиз закай туьгьметар,
Хамун къене жумар хьана кьурада.
За чIулавдаз – чIулав я ам лагьайла,
Валай душман жедач, дуьз яз рахайла.
Гьикьван гуж я шаир хьун куь арада?
Саидан хьиз, акъудиз кIанз вилерни,
Артухлама жувакай къвез хъилерни,
Вун шишинал акьалжна хьиз, чарада.
Ахмакьрикай авун патал арифар,
Гужуналди ийиз тада тарифар.
Гьикьван гуж я шаир хьун куь арада?
ГьакI тавуртIа, къениди кьаз дилидай,
Буранар гъиз, кьаз таз ширин халидай.
Дуьдгъвер лугьуз, кІуф твада ви шурада!
Шаир ятIа, цIайни вацIай физ алахъ!
Дуьз рекьевай зегьметчи халкь хуьз алахъ!
Гьикьван гуж я шаир хьун куь арада?
Етим Эмин, Сулейманни жез алахъ!
Халкьдихъ галаз явандиз фу нез алахъ!
Кьурайбурухъ ицIид твамир харада.
Сажидин, на жув шаирдай кьаз тахьуй!
Шииратдин земземдин яд хъваз тахьуй!
Гьикьван гуж я шаир хьун куь арада?
Шаир хьунин къаст аватIа, рикIивай,
Яргъа жемир адалатдин рекьивай.
Гьалал фу неъ, къуьхуьн тийир чарада!

ЗИ ЖЕГЬИЛ ДУСТ СУЛЕЙМАН
Гьик1 хьана вун, зи жегьил дуст Сулейман?
Вацра садра кьванни вучиз зенгзавач?
Чаз, шаирриз дуствал тирла эрзиман,
Алакъаяр къвердавай куьз генгзавач.
Яшар хьанвай Сажидин я ст1алви,
Гагь хуьре, гагь к1валахзавай районда.
Халкьдин рекье багъишиз гьар ст1ал ви,
Вучда за кьил гьат авурт1а уюнда?
Ч1угур зегьмет акван тийир вилерин,
Векилрикай кич1е я заз эллерин.
Гьахъ-гьисабар ийиз эхир кьилерин,
Зегьмет ч1угун за са к1усни ленгзавач.
Квехъ шиирар ава, гьак1ни манияр,
Лугьузвайла, авачиз жеч к1ани яр.
Енге вахан кьилеллайла синияр,
Са кьадар вахт амаз вучиз зенгзавач?
Сажидин я, рик1е куьк1уьр ц1ай авай,
Уьмуьр фейи, кас тачагъай гьай авай.
Ч1алар бахшиз бахтарикай пай авай,
Гьак1 нубатсуз за куьн кьилер денгзавач.

ТIАЛАБ
За Аллагьдивай ийизва тIалаб,
Чи гьар къвезвай югъ ислягьун патал.
РикIерик кутун тавуна гъалаб,
Дявеяр чалай илягъун патал.

Бес я акур кьван гъамни хажалат,
Инсанрив чилел шадвал ийиз тур.
РикIелай ерли тийидай алат,
Гафар-крарин садвал ийиз тур.

Чун хьайи рекьин хьанва яшамиш,
Артухан гьич са югъни тIалабдач.
Гьар са несилдиз хъсан яшайиш
Це, амай куьлуь-шуьлуь гьисабдач.

Девлетдихъ къаних инсанрин нефсер,
Чебни кваз, санал секинриз алахъ.
Дявекарризни, тежезвай эсер,
Чка жагъура гьа габрун къвалахъ.

Мегер гьикьван хьуй дявеяр, кашар?
Сад Аллагьди чун халкьнан икI рекьиз?
Кеф чIугун патал бахшнавай яшар,
Гьализ гице чав шадвилив рикIиз.

Сажидинан гьар са жуьре тIалаб,
Инсаниятдин рикIин мурад я.
Яшамиш жез це, тагана азаб,
Чун ислягьвилин кьилин парад я!

ИМ УЬМУЬРДАЙ
Им уьмуьрдай женни мегер гьисабиз?
Кьудкъад йисни акъатна зи гъилерай.
Пехилбуруз кIан хьана зун кьасабиз,
Ивид селлер хкиз кIан яз вилерай.
Аял вахтар гваз катна зи дяведи,
КIвачер чIурна хъуьтIун къайи живеди,
Дарвал гана, каш лугьудай деведи,
Кьилер кIватIиз, гвейи никIин чуьллерай.
Дявед йисар акъудна са гужунал,
Жанавуррин гьалтиз гишин лужунал.
Армиядиз, катна, фена хушунал,
Балугъар кьаз физвайди хьиз гьуьлерай.
Мад хтана, давамарна кIел хъувун,
Са тике фу гьикI недатIа, гьял хъувун.
Мехъерарна, кIвал хкажна, мел хъувун,
Акъакьда кьван кIвачерайни гъилерай.
ЧIехи хизан, дерди-бала бул хьана,
Акваз-такваз уьмуьрдинни зул хьана,
КIвалахарна, рикI динж хьанач пул хьана,
Амма шад я, пехилбурун хъилерай!
Сажидин, вун тек туш алай девирда,
Вун хьтинбур гзаф ава уьмуьрда.
Вири лугьуз хьаначтIан и шиирда,
Дердер гзаф хьанва эхир кьилерай!

АГЬ
Советрин халкьдиз икьван тир хаин,
Кьейи сурани жеч вун архаин.
Горбачев лугьур кицIин хва Каин,
Вун чилерайни чилериз фирай!
ЧукIурна гужлу СССР Ватан,
Вун иблис хьана, эцигай патан.
Гьарам хьурай ваз дидед гайи тIан,
Вун дустар галаз гьуьлериз фирай!
Язух кьванни халкь татана кесиб,
Агьни аллагьар хьана ваз несиб.
Уьмуьрлух алат тийидай айиб
Гъайи, цIай-гум ви вилериз фирай!
Сажидина ваз агьардач яргъал,
Кьисмет хьурай ваз нянедин маргъал.
Иви, атIана шагьдамардин гъал,
Вун къекъвей рекьер гелериз фирай!

ДУЬНЬЯ
Амач лугьуда шиирриз къимет,
Шаирар туна, катнава кьисмет.
КIантIа кьил гатут, кIандатIа ваз мет,
Шаирриз гзаф серин я дуьнья!
Низ герек я на кхьизвай чIалар?
Нубат алачиз чанда тваз ялар.
Кваз такьаз билбил, къизилгуьл валар,
Кьил акъуд тежез, дерин я дуьнья.
Пулдикай хьана девирдин аллагь,
Алахънава квел, вакIаз буба лагь.
Гьар ни вуч вичиз лагьайтIан, валлагь,
Рекьиз кIан тушиз, ширин я дуьнья.
ТIебиат хьтин дегиш жез вахтар,
Ахмакьризни кваз жагъизва бахтар.
Пул гвайдан кIаник квай чIавуз тахтар,
Къведайди анжах хъуьруьн я, дуьнья.
Сажидин, акъат мийир вун кьиляй,
Шиирар тесниф абурун хъиляй.
Текъвезвайбуруз са затIни гъиляй,
Вилерай къвезвай ирин я дуьнья!

МИНАРА

-КIварчагърин дере, вацран рагарин,
Гьуьл илиф авур Касдин тIвар алай.
Рагъ экъечIдай вахт, ирид рангарин,
Тамаш къизилдин цавуз зар алай!

Са пата Куьре гуьнеяр, аран,
Шалбуз дагъ буба кьил михьиз рехи.
Гагь туьрквер къвезва, гагьвагьши иран.
Чаз минара са герек я чIехи!-

Ихьтин гафарал рахана кьуьзек,
Яргъи чурудвай гуьцIна хьиз кьве гъил.-
Минара жеда НуьцIуьгърин безек,
Яргъаз тамашиз хкажнавай кьил!-

Хъсан меслят я, КIварчагърин дере,
Дербент шегьердиз я гзаф мукьва.
Хабардин кIунтIар ава гьар хуьре,
Амма чи жеда минара юкьва.

Агъа кранни, Квард жеда чун сад,
Гуьне патайни къведа куьмекар.
Табасаранни яхулар азад,
Абурукни ква женгчи зирекар.-

-Хъсан гафар я ацукьай къулав,
Гафар хьиз лазим я крар зерек!-
Рахана фекьи, квай диндин ялав,-
Чаз Аллагьдивай куьмек я герек!-

-Чун Сад Аллагьдиз акси ксар туш,
Йикъа вад чIавуз дуьа ийизва.
Я диндин рекье аси ксар туш,
Куьз чун Аллагьдив мидя ийизва?-

-Мегьамед стха,-рахана фекьи,-
Вун зи гъавурда акьунвач гьеле.
Душманрикай чун хуьн патал чIехи,
Лазим я инал эцигун къеле.-

Кьушунрин кьили акалзавай яб,
Верверд ийиз рахазвай гафар.
-Душманрин хура четин я гун таб,
ТIуьн туш акадал чранвай афар.

Къеле герек туш, къеле я гьар хуьр,
Гьар са кIваликай ийида къеле.
Минарадихъ са ава вичин сир,
Душман аквада яргъамаз гьеле.

Хабар це мукьвал вири хуьрериз,
Арабайраваз гъин къван-керпич.
Кас гьуьл аквадай халкьдин вилериз,
Хкажда чна такур хьтин гьич.-

Гьа и йикъалай, минара кьакьан,
ЭгечIна хкаж ийиз цавариз.
И кар кIан хьанай халкьариз акьван,
ЧIугвазвай зегьмет элкъвез сувариз.

Са акьван вахтар алатнач яргъал,
НуьцIуьгъин кьилихъ кьакьан минара.
Акьахайбур хьиз, кьакьан чархал,
Кьуд пад аквазвай гегьенш яз пара.

Девирин девир, фена шумуд сад,
Минарадикай къачуз хийирар.
КукIвариз душман, халкь ийиз азад,
Ашукьри лугьуз хьана шиирар.

Душманарни терг, я ханар, я бег,
АмачтIани чи ватанда азад.
Абурун шагьид яз минара тек,
МуьтIуьгъ тахьана амазма яз сад.

Чи бубайрилай амай аманат,
Саламатдаказ хуьн чна, эллер!
Адан гьар са къван – миллион манат,
Къизилдинбур я эцигай гъилер!   

МЕВЕРДИН ЗАВОДДИ

«Мевер» заводдин еке гьунар,
СтIалрин земзем яд акъудзавай.
Эцигайбурун сагъ хьурай анар,
Хъвайи ксарив дад агудзавай.

Гила заводди шуьшейра аваз,
«Мевердин» себеб яд акъудзава.
Ам акурла чи шегьерра аваз,
Чи пуд СтIалрин ад акъудзава.

Сагърай СтIалар, баркаллубурун,
Дуьньядизни кваз тIвар акъудзавай.
Баркаллу крар мад ава абурун.
Кьилиз гъиле кьур кар акъудзавай.

МЕВЕР БУЛАХ

И баркаван Мевердин ци,
Зи кефияр куьк авуна.
На лугьуда, гьар са тарци,
Гатфар хьана, цуьк авуна.

Я бахтавар, СтIал дугун,
Вун булахрин макан я хьи,
Мевердин яд рикIи чIугун,
Ам хъунивай мад кIан я хьи.

Гьар межлисдал, гьар суфрадал,
Рычал-суни Мевер ала.
Шад мел-мехъер гъиз арадал,
Абу-Земзем бегьер ала.

Чи Куьредин гьар са девлет,
Абур хуьн чи кIвалахар я.
Машгьурзавай лезги миллет,
Куьтягь тежер булахар я.

Мевер булах – бегьер булах,
Ажеб ширин дад ава вахъ.
Экуьнин гъед, сегьер булах,
Кьуд уьлкведа ад ава вахъ!

ЖУВ ЖУВАХЪ ГАЛАЗ

Гатфар чIаван сифте йикъар, рагъ авай,
Адахъ галаз йифни къвезвай мичIи тир.
Жуван кIвале авай гъвечIи багъ авай.
Хиялри зун кьунвай ацIай, ичIи тир.

-Са суал ваз гуз жедани, Садидин,-
Рахана жув жувахъ галаз, аял хьиз;
Сад садалай туш чун чIехи, гъвечIиди,
Чун сад садаз тамашзава суал хьиз.

-Чун кьведни сад, метлеб вуч я суалрин?
Къе ви рикIел гьикI атана рахун зав?
Гьикьван за жув гъамар эхиз усалрин?
Артухлама суалар гуз, яхун заз.

-Вун кьудкъадни кьуд йисан са кьуьзек я,
КIвалах гъиляй вахт авачир мажалдин.
Ви зегьметар низ хуш я, низ герек я?
Чамардал вил алаз къведай ажалдин.

-Са ни ятIан лугьун патал аферин,
Ч1угурди туш садрани за зегьметар.
Шиирин зи лужар цава лиферин,
Къаза авун тушни ибур гьуьрметар?

-Бязи ксар валай гвяниз атайбур,
Иесияр хьанва чIехи тIварарин.
Вужар ятIа лагь а паяр атIайбур?
Чеб акьахна, вун кIане таз гурарин.

-Шаирдин бурж я йиф-югъди кIвалахун,
Гьа кардилай авач, заз чиз, чIехивал.
Квез герек я тIвараралди дамахун?
Чандик кутаз тадай даим мекьивал.

-Вуч тазва на, фидай чIавуз «мугьмандиз»,
Кьулухъ элкъвез, рехъ амачир хкведай?
Я тахьайтIа, физвани вун пашмандиз?
Акъуд авур кас хьиз хайи уьлкведай?

-Ви суалрихъ а кьил тахьун мумкин я,
Суалар гуз гьар садалай алакьда.
Зун намусдин вилик жуван эркин я,
Эхирдалди гьа гьакI жув хуьз алахъда.

Гьелбет, залай таз алакьнач къизилар,
Шиирар зи къизилрилай ужуз туш.
Зал рази я кьуьзуьбурни жегьилар,
Нубатсуз гаф за саданни къачуз туш.

Садбур гелкъвез хийир къведай крарихъ,
За ялзава жувакай са хийир гуз.
Зи вил гала гьар экуьнин ярарихъ,
Гьар сятина са цIийи тир шиир гуз.

Жув жувахъди рахаз вердиш хьайид туш,
За жуван кар ийизвай гаф алачиз.
Сел атайла, садрани вацI хьайид туш,
Звал акьалтна, винелни каф алачиз!

Квез герек я шуьруькьуьм яд,
ТIимилни хьуй, ангула хьуй.
Дуст аваз хьуй, хьайитIан сад,
Патирпутда, Агъула хьуй.

ЗА ЭХЗАВА

Лезги халкьдин кьилел атай къазаяр,
Чи бедендал хер авунвай гапурдин;
Гун тавурла тахсиркарриз жазаяр,
Вилин накъвар авахьзавай Самурдин,
За эхзава, эй Сад Аллагь, на эхмир!

На лугьуда, дагълар хьанва есирар,
Кьил рехи Шагь дагъ, амач ваз такурди.
Лезги халкьдин квелди я лагь тахсирар?
Яд кьве патахъ тарашдай дерт Самурдин.
За эхава, эй Сад Аллагь, на эхмир!

Азад лекьер яз халкьна чун чилерал,
Ватан патал чун тушни женг чIугурди?
Гьалал фу нез вердиш жуван гъилерал,
Сергьят кIевун багъри вацIал Самурдин,
За эхзава, эй Сад Аллагь, на эхмир!

Гьикьван хьурай хажалатар чIугунар?
Къе завайни эх хъижезмач гужар чи.
Кьуразва чи никIер, багълар, дугунар.
Вахкун рикIел къвен тийизвай буржар чи,
Занни эхдач, эй Сад Аллагь, на эхмир!



КЪАРАКЪУМДИЗ ГЬИКI АКЪАТНАЙ

Вичиз тамаш, тамаш ая бедендиз,
Са кIус амай, фена-хуьквез Уьзендиз.
РикI са гъуд кьван затI ятIани хуруда,
Рехи чIарар квазни такьаз чуруда,
Зи рикIи зун гваз къекъвезва кIанивал.

Жегьил вахтар армияда пудни зур,
Йиса къуллугъ ийизни тир зун гьазур.
Ватан хуьнуьх бурж тир гьар са эркекдан,
Гъил-кIвач сагъ тир, кар-кеспида зирекдан.
Са касдизни тушир и кар цIийивал.

Армиядай хтайла, зун элкъвена,
Са кар-кеспи жагъур ийиз къвекъвена.
Мурсал лугьуз са дуст аваз, ада заз
Ни хиялнай ихьтин кIвалах кьада заз?
Адахъ вичихъ авайтIани къенивал.

Къаракъумдин къанал тадиз экъуьнна,
Яд къведайвал ийизвалда гуьгъуьна,
Ша лугьузва Турменистан макандиз,
Вич кьве рекьин хьана кIанзни такIандиз,
Заз шад хьана, и жуьре ван хьайивал.

Фидай йикъал тIвар эцигна, чкани
Лагьана заз, зиз гьатдайвал якIани.
ФейитIа зун, Мурсал са кIус геж хьана,
Ам атайла, беден михьиз кьеж хьана,
РикIиз такIан пис муштулух гайивал.

Вичихъ галаз къвезвай дустар галачиз,
Фидай цIийи йикъални тIвар алачиз;
И сеферда багъиш ая лагьана,
Захъ галаз ам, сефилдаказ рахана,
Алахъна зал чириз рикIин къайивал.

За адавай адрес физвай шегьердин,
Кхьена хьиз, Ничка хуьруьн тегьердин,
Акьахна хьиз гьар жуьредин улакьра,
Гьатна рекье, бахт жагъуриз суракьра,
Бакудиз кьван фин хьана заз цIийивал.

Паромдаваз Касдин гьуьляй атIа кьил,
Красноводский, Маридиз кьван, туна гьуьл.
Поездаваз, йифен кьулаз Мирида,
ИвичIна зун, килигна зун вирида,
Чаяр хъвазва, афицанди гайивал.

Пакад юкъуз поселокдиз Ничкадин,
Ери-бине жагъурна и чкадин.
Сейфудинан къекъвез хьана, тIвар кьуна,
Амма ада меслятдин кар кьуна:
«Заз кIанзавач хъуьруьн ина вири вал.

Пеше гвачир кас амукьда гишила,
Ви кIвалахар мумкин я хьун хашила.
Марида фад курсар ава пешеяр,
Чир ийидай, цIурурдай хьиз шуьшеяр.
ТахьайтIа вун амукьда гьакI мекьила.»

Элкъвена зун мад Маридиз, бахтунай,
Училищдиз кьабулна зун, вахтунай
Тек пуд вацра кIелна курсар кIвалахдай,
Экскаваторщик хьана зун алахъдай,
Шад хьанай заз документни хьайила.

Са шумуд суз Къаракъумдин каналдал,
КIвалахна за, къати цIай куз, зи чандал.
Ятар гъана къумад гьамбар чуьллериз,
Бахтар гъана акун тавур вилериз,
Къумлухрал чан атана яд гъайивал.

Гъуд кьван рикIи къекъуьриз зун гьар сана,
Гьич тунач зун кар авачиз, ксана.
Зун фейи кьван гьисаб кьуртIа тIварар за,
Хкаж хьайи кьва гурарин кIарар за,
КичIезва заз, амукьиз жув регъуьла.

Къени тазвай залум рикIи секиндиз,
Буйругъар гуз алахъзава эркиндиз.
АмачтIани акьван яргъи йисарни,
Акъвазнавач, гьар юкъуз гуз тарсарни.
МуьтIуьгъ я зун, авач маса мумкинвал! 

ИНТЕРНЕТДИЗ

Интернет туш, стха я,
РикIяй-рикIиз рехъ авай.
Ам зи чIехи арха я,
Адалатни гьахъ авай.

Кхьенан чIал, чап ая,
Ваъ лугьудай кас авач.
Хъел атанан – тап ая,
РикIе чIуру къаст авач.

Газет хьиз туш, журнал хьиз,
КIан хьайитIа, акъуддай.
Чпиз такIан нахал хьиз,
Акъуд тийиз, къакъуддай.

Рекье тур чар сейфера,
Баят жеда зур йисуз.
Вун гъам чIугваз йифера,
Жен тийиз секин ксуз.

Регъуьн чIурхар гъилева,
Чап ийида жуванбур.
РахайтIа вун, хъилева,
Агуд хъийич патанбур.

ГьакI хьайила, лугьузва:
Сагъ хьурай вун, интернет.
Игитди хьиз тухузва,
Ийин тийиз кIус къилет.

Жафа хьанай вунни чахъ,
АвачиртIа гуж жедай.
Валай гъейри лагь мад чахъ,
РикI кудайди вуж жедай?

Газетарни квез хьурай,
Журналарни кьилеллаз.
Гонарарни квез хьурай,
Премияр гъилеллаз.

Чаз кIани кар шиирар,
Халкьдал агакьарун я.
ЧIугван тийиз фикирар,
Ифей рикIер къурун я.

АкI хьанач хьи, Сажидин,
Газетрикай хъел ийиз.
Журналрикай тир ширин,
Дуьз хьанач хьи кьел ийиз!

КЪАННИ ВАД САН СУВАРИЗ

Гьар са нумра сел тир вацIун яд авай,
Лезги газет Бакуда тек сад авай.
«Правдадихъ» хьтин еке ад авай,
«Самур» газет ваз и сувар мубарак!

Четинвилер алуд ийиз винелай,
Лезги чIалан тереф хвена кIевелай.
Багьа тир затI течир хайи чилелай,
«Самур» газет ваз и сувар мубарак!

Лезги халкьдин и пад, а пад талгьана,
Ваз Бакуда газетхана – кIвал хьана.
Халкь кьве патал хьун рикIевай тIал хьана,
«Самур» газет ваз и сувар мубарак!

Седакъетни Музафер дуст сад хьана,
Гьар са нумра кIватIалзавай гад хьана.
Къанни вад сан яшар хьана, шад хьана,
«Самур» газет ваз и сувар мубарак!

Зазни чка жагъанай куьн газетда,
Гьар са цIийи нумра хтун гуьзетда.
Сажидина лугьузва чи адетда:
«Самур» газет ваз и сувар мубарак!

ПЕРИ БАХ

Кьуьд акъатна, я гатфар,
Ай Пери бах, Пери бах!
Тикрар ийин шад гафар,
Чан Пери бах, Пери бах!

Чуьл ацIанва цуькверив,
Ай Пери бах, Пери бах!
Шадвал гва чи рикIерив,
Чан Пери бах, Пери бах!

Ша, Яран цIай куькIуьриз,
Ай Пери бах, Пери бах!
Ша, чи крар туькIуьриз,
Чан Пери бах, Пери бах!

Припев:
Ай Пери бах, Пери бах!
Чан Пери бах, Пери бах!
Чан чи виртни гъери, бах,
Шад я чун вал вири, бах!

КАС ВА ВОЛГА

И дуьнья вич халкь хьайи дегь чIавалай,
Аламатар хьанатIан бес кьадардин.
Мажбур я зун, аслу кIвалах жувалай,
Муштулух гуз, ван хьайи шад хабардин.

Урусатдихъ са руш авай гуьрчег тир,
Ам кIанибур авалдай кьуд уьлкведа.
Рушахъ къизил кифер хьунни керчек тир,
Адан тариф авай Дербент, Меккеда!

Чир жеда кьван Урусатдиз рагъ пата,
Кьакьан дагълар, женнет аваз аквада.
Игитарни гзаф аваз дагъ пата,
Фагьумна хьиз, ихьтин план чIугвада.

Урусатди жив гваз цифер - илчияр,
Рекье твада Кас хва авай Кавказдихъ.
Кефер патан гарар галаз - зилчияр,
Къекъвез жеда чпиз ганвай заказдихъ.

Кавказ дагъдихъ гзаф авай рухваяр,
ЧIехи хцин тIвар чи Лезги Кас хьана.
Чи Каса хцихъ гзаф авай архаяр,
Адан тIварни гьуьлел хьуниз хас хьана.

И Кас гьуьлел ашукь рушар бул авай,
Акатайдан кьил кьаз кIан туш Дагълариз
Адахъ гьисаб тежер къизил пул авай,
Свас це лугьуз физ кIан тушир яргъариз.

Зулун вахт тир, цав кIевирдай цифери,
Гарар галаз къвезва течир инсанар.
Са шад хабар гваз атана лифери,
Къвезва лугьуз Кефер патай мугьманар.

Кавказдин рикI алайди я мугьманрал,
Хуш кьабулна, фу гваз алай иситIа.
Хкаж хьана абур дагъдин кьакьанрал,
Важиблу тир меслят ийиз хьайитIа.

Циферик квай жив ацукьна дагъларал,
Гъил агакьдай гъетерални кьакьан тир.
Ашукь хьана Аран патан багъларал,
Амма Касаз Кефердин мурк такIан тир.

Илчийрикай сад рахана Кавказдихъ,
РикIяй-рикIиз къавум хьунухь паталди.
Къавун гьикI жен Урусатдин Аяздихъ?
Эхир рекьив атана са гужалди.

Урусатдихъ агакьнавай руш ава,
Адал Волга лугьур гуьзел тIвар ала.
Куьн Касакай езне кьунукь хуш ава,
Куьн патай ам це лугьунал кар ала.

Рушахъ девлет ава а кьил авачир,
КIан я адаз вичикай са гьуьл хьана.
Масабурун темягь, рикI-вил галачир,
КIан я адаз Кас са вичин гъуьл хьана.

Мугьманар хуш, мугьманрин гаф чIур тийир,
Кавказдивай хазни хьанач кефияр.
Шадвал кIани гьуьрмет, хатур къур тийир,
Тамадавал авай кIандай кефчияр!

Зулун вацра, бул авайла ятарни,
Це лагьана Касаз Волга лугьур руш.
Рази хьана и кардал кьве патарни,
Кавкздикай къавум хьунухь хуш хьана.

ХъуьтIуьз чпин гьазурвилер авуна,
Башламишиз кIан жеда кьван мехъерар.
Гатфар алукь авурла геж тавуна,
Зуьрнечийри яна чпин «Сегьерар».

Урусатдин девлет аваз гуьгъуьна,
Волга гъана Касдин кIвализ – тавхана.
Яргъа мензил цивди атIуз, эгъуьна,
Волгад кьилел ракъар алай цав хьана.

Волга вацIуз вичиз кIани гъуьл хьана,
Кавказ дагълар, урус сусал гуьлзава.
И кьил, а кьил  акван тийир гьуьл хьана,
Лезгинкадал лепейривди кьуьлзава.

А мехъерик занни жуван нубатдин
Лезгинкадал хкадариз кьуьл авуна,
Касдиз Волга, свас яз гъункай гьайбатдин,
За квез инал куьруь негъил авуна.