Марксизм ай коропаня

Ошколовав нас Дарвін Чарлі-бачі
Што Бог из малпи чоловіка учинив.
На бороду взяв Фредді Енгельс децу-
(Цімбору Маркса гостив!)... Пак  вповів:

Послухай, Корчі!  Сяк могло то боти-
Перич шіковно малпу сотворив,
Бізувно довго нюпав, позерав на ниї
Пак рендешно божественно гласив:

Недуйдава, ай тварь доста паскудна,
Но матріалу я потратив даз сто кил.
Кидь здемекати и зліпити назад,
И пофарбити – буде крокодил!

Айбо не смирть -  жівот тобі даруву!
Из тебе справлений да буде чоловік.
Чіношний, читавий, бо вже я не шатуву -
Помали внаджити тото ся буде вік.
   
Многая літа будеш фурт в роботі,
В поті чола здушена їсти хліб.
Ай гроші шпуровати у гризоті
И знемагати д вшилияких бід!

А Корчі Маркс бов гамішний. Гнівачий,
( «Капітала» не мав, а пити щи хотів…)
Почухав бороду, - послухай Фредді-бачі
Што я би на сесе тобі вповів.

У керті м вчора став на коропаню,
Пудховзся и упав в коровлянки.
Но што повісти мав Всевишній Няньо
Як жабу сотворив нам на віки?

Но то парада! Чисть моя і слава!
Жий нараз добре и про нич не збай!
Взимі ся вуспи, а пак грійся, плавай -
В каждум болоті буде тобі рай!


Список літератури.
1. Чарльз Дарвін «Походження людини і статевий добір» 1871 р.
2. Charles Robert Darwin  On the Origin of Species by Means of Natural Selection, or the Preservation of Favoured Races in the Struggle for Life 1859 р.
3. Енгельс Ф. Роль праці в процесі перетворення мавпи в людину 1896 р.