Мам я утварь шиліяку:
Гордови, корчажки.
Из Кайзера, Ємнуй, Ruma
Щи й пуд Рати фляшки.
Кеги, баки і каністри,
Сіфони, бідони!
З перестройки шпуровані
На цукор талони.
Канти, лавори і відра,
Дінерки, довжанки!
Ховам од жони в пивниці
Трилітрові банки.
Драйфус, гокерлик, канчови,
Коршови, варіхи!
Пувлітровки ай чекушки
Складені у міхи.
Деклики, феделки, чопи,
Дуговки, затички!
А кидь дашто не штимує
З тингиріці гички!
Фінджі, кофлята, погари,
Тивчарі і лєйки!
Радий дуже, кидь дадуть ми
Фалат нержавейки.
Рули мідні і желізні,
Щи й алюмійові.
Чиську цидку –
Из ньов баба ходила д корові.
Аламбік і дефлегматор,
Шарантські колони.
На глибокой занурення
Є в мене балони!
Фурт ми з Ружков на кар’єрі,
Айбо я не дайвер.
Не рибарь і не вадасник,
Не з біцігльов байкер.
Не художник-інсталятор –
Вадь дакий дизайнер.
Хоть не бов им в Амеріці,
Праве, я - Муншайнер!
Moonshiner. Дорогим колегам з США
© Copyright: Микола Мага, 2017
Свидетельство о публикации №117052904428
Свидетельство о публикации №117052904428
Рецензии