Дап1назу аьссина зигар

ДАП1НАЗУ АЬССИНА ЗИГАР

Ади дин ккундарзуз!
К1уч1лар ап1ура диди!
Гьюкумра ккундарзуз!
Йизуб ип1ура диди!

Йиз дин айиз!
Дидиз к1уру Ккунивал!
Гьюкумра азуз!
Дидиз к1уру Намус!

Гъит Ккунивализ ап1ури ишри узу икрам!
Дидиз тувуз йиз жан гьяйиф дариз!
Гъит Намусну дерккри узуз гъадагъйир!
Дидин гьюкмар йиз к1ваъ дидик1найиз!

Узу азад инсан даруси
динди гьамци-гьатци ап1ин к1уразуз!
Узу фагьумсуз вуйибси
гьюкми жилик кайи йиз пай туврадарзуз!

Сабди узхъанди фикир ап1ура!
Ва чануб узуъ т1ап1ра!
Тмунубди узухьди лихуз гъитра!
Ва йиз гъилихуб чаз ип1ура!

Чануб нигь гъап1иш
узу кяфириз илт1ик1ура!
Мидиз йизуб тувдарза гъапиш
дидисну дустагъдиъ итра!

Узу фуж духьна мурариз
хут1ликк ккайи йиц?!
Динди узлан т1ул алдатура гъарабх к1ури!
Гьюкми гъагъи мукьйир хъит1ра хъадабк к1ури!

Эй динар, узу сикинди гъитай!
Гьаз инсанариъ хиц1си ич1ибгнава!
Гъарабх удубч1вну гъулар шагьрариан
уву гъафи яв ич1и гъумарин чюллериз!

Эй гьюкум, яв къанунар узуз лазим дарзуз!
Йиз Адашди Чан Къанунар йиз гъянаъ т1аънайиз!
Сабан уву узуз жилик кайи девлетнан йиз пай ча
хъасан уву ккун ап1уруш узу фикир ап1арза!

Уву, дин, яв аллагьарна шариаьтар хьади
жварт1 йибхь йиз улариккан!
Аьршариъ айи йиз Адашдиз узу кьабулди ву!
Ич арайиъ уву дуфну муубч1ван!

Дарза узу инсан
гьюкми аьхювал ап1урайи!
Дарза узу мусурман
динди к1уч1лар илит1найи!