Сказка о рыбаке и рыбке. А. Пушкин. На мокш. языке

      ЁФКС КАЛОНЬ КУНДАЙТЬ И КАЛНЯТЬ КОЛГА (ЁФКС ЗЫРНЯНЬ КАЛНЯТЬ КОЛГА)
 
    Атят бабат марс кафонест эрясть
Талой сенем морять трваса;
Синь ташта землянкаса эрясть
Колмогемонь колмува кизот.
Калхт кунцекшнесь неводса атясь,
А бабась эсь сюрензон кштирькшнесь.
Атясь ёрдась весть неводть моряв, -
Сась най тишетне мархта неводсь.
Оду ряд сон ся неводть ёрдась, -
Кундась неводса морянь тишеть –
Колмоцеда ёрдась сон неводть, -
И сась неводсь фкя калнять мархта,
Аф фалунь, а золодонь повсь калнясь.
Кодак эняльдевсь золодонь калнясь!
Ломанень вайгяльса сон корхтай:
«Нолдамак тон, атяняй, монь моряв!
Питни пандома инкссон максан:
Пря идян мон мезса аньцек калят».
Дивас прась эзк и эводсь пяк атясь;
Сон колмогемонь колмува кизот
Кунцесь калхт, изь марьсекшне, калсь штоба корхталь.
Нолдазе сон ся золодонь калнять,
Корхтась валня тейнза инь ёлаж:
«Шкайсь тонь мархтот, золодонянь калнясь!
Идема аф эряви тонь эздот;
Архт, ямбарнясь, стак сенем моряв,
Гуляндак эсь мяльсот просторса».
   
   Мрдась атясь ни бабанцти куду,
Азондсь тейнза инь оцю няйф чудать:
«Нльне кундакшнень калня мон тячи,
Аф фалунь, а золодонь повсь калнясь;
Эсь лацонк кортакшнесь калнясь мархтон,
Пяк ни эняльдсь куду сенем моряв,
Питне инь оцю макссесь эсь прянц идемс:
Нльне идендсь прянц мезе аньцек калян.
Идеманц аф смендань сонь сявомс,
Стак сонь нолдайне сенеме моряв».
Атять сюцекшнемс кармась эзк бабась:
«Шава пря тон, простенькай атясь!
Пандоманц калть изь маштоть тон сявомс!
Сюма хуш сяволеть сонь кяттста,
Миннесь ёфси вдь лазовсь-каладсь».
 
Вов сон тусь сенем морять каршес ;
Ваны – налхкозевсь малостьке морясь.
 
Кармась серендемс золодонь калнять,
Тейнза уезь сась калнясь и макссь кизефкс:
«Тейть мезяма, атяняй, эрявсь?»
Сюконязь атясь тейнза отвечай:
«Милостивендак, оцязор-калнясь,
Кудса сюцекшнемань монь рьвя-бабась,
Аш покой, тейне атяти, ёфси:
Эрявкстовсь тейнза одня сюманя;
Миннесь-то ёфсине каладсь».
Каршес корхтай золодонь ся калнясь:
«Тяты лажна и архт тонць шкайть мархта,
Ули тиньдейнт сюма одня».
 
    Мрдась атясь ни бабанцти куду:
Ащи одня сюма бабанц ваксса.
Коль сяда сюцекшни най сонь бабась:
«Шава пря тон, простенькай атя!
Анафтоть, шава пря, сюма одня!
Сюманясот оцюль асу?
Мрдак калняти, шава пря, меки.
Сюконяк тейнза, кудня ни анак».
 
    Вов сон тусь сенем морять каршес;
(Пяндоргофтовсь сенеме морясь.)
Кармась серендемс золодонь калнять,
Тейнза уезь сась калнясь и кизефтсь:
«Тейть мезяма, атяняй, эрявсь?»
Сюконязь атясь тейнза отвечай:
«Милостивендак, оцязор-калнясь,
Коль сяда сюцекшни эсон бабась,
Аш покой, тейне атяти, ёфси:
Кудня анцекшни сялонды бабась».
Каршес корхтай золодонь ся калнясь:
«Тяты лажна и архт тонць шкайть мархта,
Стане ули катк: кудня ни тейнть».
И тусь сон эсь землянказонза,
А землянкать аяш ни следоц;
Няи, ингольденза куд валда,
Трубацка кирпицень, архтф-акшептф
И ортанзовок тумоньнет и тёсонь,
А вальмянять ваксс озаф бабась,
Мезь лангс ащи шись, мирьденц сон сюци:
Шава пря тон, виде простенькай атя!
Анать, простенькайсь, кудняня!
Калняти сюконяк, мрдак – архт:
Мольсь мяльсь улемс рдазу крестьянкакс,
Афкуксонь калян улемс дворянкакс».
 
    Тусь атясь сенем морять каршес;
(Сенем морясь аф сятяв – таколдф.)
Кармась серендемс золодонь калнять,
Тейнза уезь сась калнясь и кизефтсь:
«Тейть мезяма, атяняй, эрявсь?»
Сюконязь атясь тейнза отвечай:
«Милостивендак, оцязор-калнясь!
Коль сяда пяляскодсь сире бабась,
Аш покой, тейне атяти ёфси:
Мольсь сонь мялец улемс ни кресьянкакс,
Афкуксонь  каляй сон дворянкакс».
Каршес корхтай золодонь ся калнясь:
«Тяты лажна и архт тонць шкайть мархта!»
   
    Мрдась атясь ни бабанцти куду.
Мезь сон няи? Вов сери терем.
Крыленцять лангс ащи авац-бабац,
Соболень щась питни душегрейкать,
Макпрясонза парьхциень кичкась,
Жемчукне стакалгофтозь сялдазть,
Кядьсонза золодонь сонь суркссна,
Пильгсонза кемонянза якстерхть.
Ингольденза сонь виде слуганза.
Сон синь пиксси, шяярьдавок усксси.
Ава-бабанцти атясь сонць корхтай:
«Шумбрат, рьвяня баяраваня дворянка!
Пади, тяни ваймоняце тонь сатфтовсь».
Лангозонза пешкодовсь эзк бабась,
Алашань карду кучезе сонь вардамс.
 
    Вов ни неделя омбоцесь ётай, 
Коль сяда пяляскодсь сире бабась;
Сон тага калняти атять ни кучсы:
«Калняти сюконяк, мрдак – архт:
Мольфнесь мяльсь улемс афкуксонь дворянкакс,
Вольнай калян улемс мон царицакс».
Эняльдевсь атясь, сонць эводсь:
«Пяляс тишеда штоль, бабась, ярхцать?
Шятямс и корхтамс тон афле маштат!
Раксефтят тон сембе эсь царствать».
Сяда кяжиясь сире бабась,
Щёка ланга эрьхтезе атять.
«Кода смедондат спорьсемс, крестьянсь, мархтон,
Монь мархтон, усяф дорянкать мархта? –
Архт морять ваксс, тейть вдь видеста корхтайхть,
Кли аф молят, то вяттядезь вихца».
 
    Атянясь срхкась морять каршес,
(Равчкодсь-шобдалгодсь сенем морясь.)
Кармась серендемс золодонь калнять.
Тейнза уезь сась калнясь и кизефтсь:
«Тейть мезяма, атяняй, эрявсь?»
Сюконязь атясь тейнза отвечай:
«Милостивендак, оцязор-калнясь!
Монь сире бабась тага бунтавай:
Мольсь сонь мялец улемс ни дорянкакс,
Вольнай каляй улемс царицакс».
Каршес корхтай золодонь ся калнясь:
«Тяты лажна и архт тонць шкайть мархта!»
Да, пара! Ули бабась царицакс!»
 
    Бабанцти мрдась атянясь меки.
Мезь? Сонь каршес царень палатат,
 
Палатаса няи сонцень бабанц,
Шрать ваксс озаф ащи сон царицакс,
Баярхне, дворяттне служайхть тейнза,
Омбоморянь кайсихть тейнза винат синь,
Суски-ярхцай сон меле пяцятлаф прянька;
Перьфканза коль ащи кяжи стражась,
Лафтусост синь узернят кирдихть.
Кодак атясь синь няезе, - эводсь!
Бабать пильгозонза сюконясь сон,
Корхтай: «Шумбрат тон, кяжи царицась!
Эрь ни тяни ваймоняце тонь сафневсь!»
Шамазонза афле вансь сонь бабац,
Аньцек сельмостонза панемс кошардсь.
Эсток баярхне ласьксть дворяттне мархта,
Тостятькшнесть эзк атять сялдаз ланга!
Кенкшнень ваксста стражась козк сась ласькозь;
Узернятне мархта цють изь керсе.
А народсь-то лангозонза раксесь:
«Так и эряви тейть, сире мокорь!
Содама тейть инголи, шобдась:
Тяты озсе аф эсь нурдозт!»
 
        Вов ни неделя, омбоцесь ётай, 
Коль сяда пяляскодсь сире бабась.
Кучи царень служайхнень мирденц инксса,
Атять вешезь, тейнза вятсть сонь ямбарть.
Корхтай атяти бабась:
«Калняти сюконяк мрдак-архт,
Мольсь мяльсь улемс ни вольнай царицакс,
Азоравакс морять калян улемс,
Штоб эрямс море-Океанса,
Штоб тейне вардодель золодонь ся калнясь,
Кучема-азома вастса улель».
 
    Изь смендакшне атясь молемс каршек,
Изь тяряфта корхтамс туркс валня.
Сенем моряти вов сон моли.
Няи, моряса стясь равжа даволсь:
Так и паймашкодсть кяжи волнатне,
Так и якайхть и сувозьса сувихть.
Кармась серендемс золодонь калнять,
Тейнза сась калнясь и кизефтсь: 
«Тейть мезяма, атяй, ни эрявсь?»
Сюконязь атясь тейнза отвечай:
«Милостивендак, оцязор-калнясь!
Сюдокшнеф бабать мархта мезь тиемс?
Мольсь ни мялец улемс вольнай царицакс,
Морянь азоравкс  каляй улемс;
Штоб эрямс море-Океанса,
Штоба вардоделеть тонць тейнза,
Улелеть кучема-азома вастса».
Мезевок ашезь аза калнясь,
Аньцек пулоса ведьге жольнефтсь   
И тусь ёфсикс мянь крхка моряв.
Ламос учсь каршек вал сон ведть ваксса,
Ашезь учсева, шарфтсь бабати меки –
Плкшт: землянкась вов тага ащи,
И порокть лангса бабац озаф нюрьхкси,
А ингольденза сюма калада ташта.

Ётафтома 2010-2017.
Перевод на мокшанский язык 2010-2017. Стихи на мокшанском.

Комментарии
В 1937 г., в год столетия со дня смерти А. С. Пушкина, в издательстве
«Детиздат» (Москва-Ленинград) на мокшанском и эрзянском языках была издана
«Сказка о рыбаке и рыбке» в переводе П. Левчаева и В. Рябова. Однако вскоре эти
книги были изъяты из библиотек, т.к. авторы переводов подверглись репрессиям.

Оригинал текста на русском языке:
http://pushkin.niv.ru/pushkin/text/skazki/o-rybake-i-rybke.htm