Са дишегьли вердиш хьана,
Къуншидал кlвализ илифиз.
Тlуьнар-хъунар таниш хьана,
Гъиз эцигиз хъфин тийиз.
Къунши я кас жуван лугьуз,
Рикlин мердвал къалурдай.
Икl гьамиша жедан лугьуз,
Тlуьнар-хъунар гьазурдай.
Гьамишанда икl ацукьиз,
Адаз гзаф хуш жедай.
Мукьвал-мукьвал галукьариз,
Хъвадай чайни нуш жедай.
Гьамиша чаз икl лугьуда:
"Мугьман кlвалин абур я! "
Вичи суфра къурмишдай,
Гьич викlегь туш, агъур я!
Икl лагьана къуншийри:
" Ви кlвалин рехъ къалура!
Айибда ваз ви багърийри,
Кlвале са экв куькlуьра!"
Йикъарикай са юкъуз,
Чара хьанач теклифна.
Ви кеф-гьал гьикl я лугьуз,
Къуншиярни илифна.
Катун-калтугун кьасухдай,
Рахадай мажал хьанач.
Я суфрадихъ вич ацукьдай,
Ачух чинни,гьал хьанач.
Са жуьреда ам гелкъвена,
Бейкеф хьанвай аял хьиз.
"Мад аквада квез,эгена"-
Рикlяй вичин хиял физ.....
Мугьман
© Copyright: Марьям Алискерова, 2017
Свидетельство о публикации №117042608825
Свидетельство о публикации №117042608825
Рецензии