Къубайин жин

     (Махъв)

Гъахьну-гъахьундар гъулаъ,
Сивар-дагъларин кьялаъ,
Багарихь шагьрин Къуба,
Дуланмиш шули аба.
Чан бахчайиъ кьабирин,
Гьарар айи нарарин.
Гъач дупну чахъди бализ,
Уч дапIну нарар шишлиз,
Ахьну сабкьан дарпиди,
Вари кюгьне машиндиъ.
Хъайигъан, мучIу зав’ин
Лишан гъивубси ахсрин,
«Баркаллагь» дупну гъардис,
Дербентдиз гъуш базариз.
Хьайиз хябяхъдин гъудган,
Имдайи нарар сабкьан.
К1ару пенжек чан гъардиз,
Бализра бачук1 кьюрдиз,
К1ваълан гьадрапIди хизан,
Гъадагъну, дарап1ди кьан.
Вари ляхнар ккудук1си,
Хъап1ру машин чан, мик1си.
Саб дупну хабарсузди,
Наънан вуш гъафи, нярсди
Улихь гьубч1ву машиндин,
Гъалаъ урсру минутдиъ.      
Машин ву касдин балин,       
Уткан, жара уьлкейин.
Рангнануб гъизил-гъатху,
Чархарра ккайиб аьхю.
Вари ляхнар гъахьи чIур,
Эйсийи гьамус фу к1ур?
Эйси ац1у фун хьайи,
Ярхи галстукра ккайи,
Гьигьланди ил хътабгъури,
Гъюр багахьна жаргъури.
Улар кидирчну шлуси,
Гергми дап1ну ппаздиси,
Хилар заргну сес – гьарай,
Ипна мугъу «вайгьарай»!
Гъабхьнуки лап юкIв кIару,
-Йип ари: Гьамус гьапIру?
Абайихьна гъюр сифте,
Му уьрхюрайи десте.
-Аьхюриз дуфна,к1ур, хъял,
Язухънан шулу яв гьял.         
Арццну намуссуз ушвар,
Ап1ури кифир люкьнар.
Ушвниин гьай чпин дициб,
Алабхьри азар сац1иб!
Аьгъдар биц1ир, я аьхюр.   
Ишричва, йип, гьилли мур. 
Гьякимри кьабириз к1ур:
-Духьнана, дарш, уву кур?
Наънан вушра закуриз,
Уву гъап1у хат1айиз,
Му яв диван ап1айиз,
Миллион пул хурва йиз.
Вуйиб гьяким тямягькар,
Гъабхьи абайиз ашкар.
Мугъан гьял гъабхьи читин,
Гьамус гьап1урва, йитим?
Ихь аба русвагь гъаши,
Хъа, к1ул за дап1ну, гъапи:
-Яв кьиматнан гьякьнаан,
К1арзувуз дарап1ди кьан.
Туврушра малар, хулар,
Дициб пул узуз шулдар.
Жан гьяким, дап1ну язухъ,
Сабан хъебехъа узухъ!
Тюнт махьан, яваш, инсан!
Хъасин ап1ин гьякь - диван.
Дупну, йирси шишлиан,
Адабгъну лампа шейт1ан.
Йирси лампа дибисну,
Гъваллан хил чан аьлдяхну,
Дих ап1ур жиндиз шлуси,
Хъа жин улхур инсанси:
-Саламалейкум даи!
Йип дерди фу вуш ари!
Завуъ, жил’ин абгурза,
Шулуш тамам ап1урза.
Чухсагъул яв гафариз,
Аьбкъин му йиз хялариз,
Таза к1ару чай, стакнар,
Хъа чайрахъна хъиврудар...
Ккунш мухъугъан, ккундуш – хъугъ,
Тамам гъабхьнийи гъуллугъ.
Дупну ккудубк1си, чай ихь,
Фу лигурва? Хьа улихь!
Гьякимриз му арайи,
Хъял гьархну чаз дуфнайи.
Хъа гъапнийи, духьну ис:
-Махьан зат уву кьискьис.
Эгер пул адарш вари,
Лампа ча узуз йирси.
Хъябяхъ аба - ваъ макIан!
Хъасин хьуз мумкин ву кьан...
Гъапи абайи дугъаз:
-Шарт1 му яв хуш вуйиз к1ваз.
Дици вуш гьамусяаьт,
Ибшри гьациб мясляаьт.   
Дюз шулуш ляхнар вари,
Гъайибх лампа вуш ари.
Бисруган лампа йирси,
Гьяким аьмалдар сулси,
К1уру чаз дерд кайиси,
(Духьну к1ваант1ан рази):
-Дердер мап1ан гьич аба!
Хат1а дубхьнадар зурба!
Йип вуз фу ккундуш узкан,
Пашман махьан,эй, инсан!
Ма пулра увуз вари,
Айи-адру жибариъ.
Хъа гиранвал кмиш, ари,
К1ваант1ан аьфу ибшри.
Рякъяриъ йихь ихтият,
Гьич мапIан чIуру ният,
К1улиз шулив аьзият.
Мици шули ву аьдат. 
Бегьем рягьят дубхьну к1ваз,
Диш гъахьи аба гъулаз.
Хъа гьякимри чан хулаз
Вахтланан ц1иб, хаинкри
Уч ап1ур мирас вари.
Дуфна хулаз гьякимрин,
Гъудган дап1ну лавландин,
Аьхюр-биц1ир дарпиди,   
Маил-мадат чан вари.
Уч духьна тухум-тара,
Магьа хъуркьну дустарра.
Хпир Суна ликт1ин духьна,
Гутйир хъана агура .
Шуру «игит» абайин,   
Гъуншдихьан уьлер хура…
Гьякимрихьан аьхирки,
Бабу гьерхру явашди:
-Яв гаф учуз ибшри нуш!
Жан бай йипа фу гъабхьнуш!
Духьну гьяким ликри за,
К1уру: «Ав, мажбур вуза…
Йиз сир ашкар ап1арза,
Дагълу ппаччагь хьуз кказа.
Йирси лампа дибисну,
Гъваллан хил чан аьлдяхну,
Дих ап1ур жиндиз шлуси,
Хъа жинди к1ур улихьси:
-Саламалейкум даи!
Йип дерди фу вуш ари!
Завуъ, жил’ин абгурза,
Шулуш тамам ап1урза.
-Хъебехъ жин! Машат мап1ан,
Гаф ккудубк1айиз сабан!
Узуз ва йиз дустариз,
Аьбкъин, лап бегьем хьайиз:
Арагъ, чяхир, убхърудар,   
Дурарихъна хъиврудар.
Шурпа, йикк хъайи хинк1ар, 
Жюрбежюр ицци ц1икбар,
Юкьуб жюре кабабар,
Дурхьнайи таза пеар.
Салатар, хахар – масар,
Лап багьайин папрусар….
Жинди гаф гъап1у кьат1ар,
Гъапи, кидичну улар:
-Яваш, яваш! Я даи!
Лизи мап1ан йиз мужри!
Сабур тув! Йихь архаин!
Фу к1урва? Гьап1ру аьбкъин?
Ккебехъ сац1иб, гьей, аьвам,
Список мап1ан яв давам!
Бизарра мапIан гамгам.
Узу урус жин дарза!
Ярхла Къубай`ан вуза! 
Хилиъ шлин а дицистар:
Ц1икбар, хахар, папрусар ?
Йиз ихтиярнаъ айиб,
Анжагъ чай ву! Ай касиб!!!...