Йипа адаш

Дустар гьяятдиъ а йигъан:
Велина, Дадашна, Гьясан.   
Амма улар духьну пашман,
Адашдихьна дуфна Аслан.

«Йипа, аллагьисан адаш,   
ГьапIуз ухьуз дада адарш,
Гъач агурхьа, думу дургнаш,
Рябкъюз ккундузуз дугъан маш.

НивкIуъ гъябкъюнзуз йишвну сан,
Машкквар дуфну ЦIийи йисан.
БицIидар уч духьна гъулан,
Убгъури ашра йиф зав’ан.

Аьхюб бицIиб зат дарпиди,
Яртур вари мярхярихъди.
Фуж улихь хьа, фуж кьяляхъди,
Талит гъабхура чиб-чпихъди.
             
Аьлди бисна канчI дадин чан,
Туп гъадабгъ кIури чаз уткан.
КIура дадайи : «Йиз массан!»,
Адруганси думу сартIан.

Лап фурс кади ашул Дадаш,
Уьру дапIну аязну маш.
Дади тувру гъабшиган гаш,
Гагь цIиквар, гагь йиркк кайи аш.

Дадихьна жаргъуру Гьясан,
Эгер ктапIиш чаз цIиб гиран.
Хъа шулу даршиси пашман,
Аьлдяхиган хил чан кIуллан.

Белки узу, вуйкIан дарш             
БицIи вахтна жинжал, угъраш.
Узккан дада аьси духьнаш,
Хил алдабгъ йип уву адаш!»