Сивун ягъал кIакIариз за дапIназа,
Шаиринси, кIул, абцIнайи фикрари.
Майдандиин диржну ликар деъназа,
Табиаьтдин багъривал гьисс апIури.
Ватан уягъ дапIна. Дуфна хьадукар.
Пагь, такабур вахт даринхъа успагьи!
Гъафунва инсандиз гъабхьиган бакар,
Сагъди гъитри жандак яв, инжиг дархьи.
Нур атIабгна чюллериъ ригъдин машну,
Табиаьтдин гюзел рангнахъ балгури.
Алдабгъура лизи бачукI манишну,
Аьхиримжи пашман мяъли урхури.
Миркклин мичIал нир гъябгъюра сес хъади,
Гъи чан азадвалиин гьяйран вуди.
Аьмлюхъ гьарин дийибгънайи фурс кади,
Шикил нириъ атIабгнада утканди.
Гьар бабат ниъ туврайи бул кюкйири,
Гьевес капIра кIвак, хуш вуйи мукьмиси.
Гъидикьури гьар жюрейин рангари,
Хъпалгура жил халачийин накьишси.
Хьадукар
© Copyright: Гюльмагомед Расулов, 2017
Свидетельство о публикации №117042202598
Свидетельство о публикации №117042202598
Рецензии