Гъулаз газ гъизигну

Аьхюр – бицIир дарпиди гьарсаб хул’ан,
Газ хъипру кIури, гъуландар уч духьна.
Разивалин хабар хьади шагьриан,
ГакIвлин кIулар али гьякимар дуфна.


Гъуллугъчийи ккебгънайи ихтилатнаъ чан,
Фици газ гъулазкьан дуфнаш, ктибтура.
Гъуландар гафариин гьяйран духьну,
Гьяйиф дарди гурлу гарччлар йивура.


«Гъитай дустар артухъ чалачмиш’валар,
Ккун апIурза гъапи гафнахъ хъебехъуб!
Рякъюручвуз гьамус архаинвалар,
Аьхълушнариз лазим дар зат гьязур хьуб!


Дуфнашра кьюрд гъулариз хабарсузди,
Герек дар зат гакIвлар гъуршнарикк дивуб!
ГвачIинтIан хябяхъдиз саб ляхин дарди,
Гьамус вуйиб ичв ляхин ву гешт хъапIуб!


Бисми дапIну, ккебгъу ляхин хайирлу
Фила вушра аьхирра хъайиб шулу.
Гъапи гафар гъапIиш учву аннамиш,
Гегьеншиди шулхьа гьамус яшамиш»…


Сар яшлуйи дебккну дирбаш ихтилат,
Улихь духьну хил за дапIну явашди,
Сикин дапIну, юкIв, абхънайи гьяракат,
Гъапну дугъаз, дийигъну машна-машди:


«ГьапIуз угъраш, хяртIахъишв цIабхурава?
ДапIну машра даттлин рягърягъси уьру!
ГьапIуз халкьар авру дапIну дерккнава?
Улуп ари газ, дизигнайи уву!


Гьюкуматдин законар ликрикк ккиври,
ИпIури пул, девран дувхьнадарнив хуб!
Махъварихъди инсанар гъаврикк ккаъри,
Лазим дар яв гьюрматсузвал улупуб!


ТIаурза кIуйва гьякьлу дигиш’валар,
Бисну пайдагъ, гьякимвализ гъягъруган.
Гъябкъюнчуз яв гьякь кутру кучIлин гьунар,
ШайтIан ляхнар халкьдиз ашкар гъахьиган».

Гьякимари собрание ккудубкIну.
Кьиблайизди гакIвлин кIулар илтIикIну,
Ход тувра машиндиз, дарапIди инсаф,
Дубхьна, кIури, фунариз ич гаш гизаф.