Уьмур аза дубгъури

УЬМУР АЗА ДУБГЪУРИ

Гагь-гагьнак гимихъ шуйза
ихтлитарихъ хъпехъури,
ликарихъ гьясйир хъайидарин
гьюрмат улиъ уьбхюри…
Иб гафарихъ хъивраза
фагьум бисну фикрари,
шерик духьну, хьуз гъаври
ктитурайи гьядисйирин.

«Гъачгъари гъулар тІараш
апІруган, ккадахьдарин
сузйирихъ хъуркьру жили
жви гъахьундар, гьял кайи.
Кьабидар духьнайи гъаллаш
мурзнахь гьирчуйи гъилинжин,
мяшат дарапІуз жизби
чпин ляхниз ифи хъайи.

Гъи ухьухь дурарикан
ими гьярам ипІури.
Къанунарин диб ккапІну,
кент-худа арагури,
туври даш-баш хил-хил‘ан,
чпиз гьюкум адапІури,
улихьдин маллйир гъутІу,
а гъира, ксиб ктабгъури...»

Йиз хлиъ уьмур абхъган,
кІул‘инди якьинтІануб,
гъавриъ шули гъашиза
думугандин сюгьбтарин.
Шлиз, учв кучІларикк ккахъган,
дарш уьмур аькьюлтІануб
гъабшишра, даршир кІарза,
гьякь гафарси кьабирин.

Йиз жикъи яшайишдиъ
алахьунзуз йисар пис –
вуш-дарш ктитури «ниркан»
чІиви даршуз, уьргъюри.
Гъалиб духьназа дявдиъ
къанунсузариин гьярис,
гьацІ пай йиз саб уьмрикан
харж гъапIган, дарди гьяйиф.

Раццарихъ абйирихъан,
гирнар кимбударикан,
дарснаъ мялимарихъан,
гьякьяр кІурайидарикан,
йиз йитим адашдихъан,
кьутІкьал гъабши уьмрикан,
гьамусдиз гъубшубдихъан,
уьмур аза дубгъури,
узура гимихъ ктибтруси
узусир жигьилин ипуз ибаъ.