ИЧ НИР ЦІАНГАР
Вахтнан фунуб фасил вушра,
Гьюдюхбягъ гъядар чан рангар.
Селер, ригъар ургъурашра
Жангар вуйич нир ЦІангар.
Зюргъликк баяр жикІурашра
ЧІюргъдар дидин гьяни паргар.
Учв манишну йибкІурашра
Гварар ацIрич нири ЦІангар.
Зав‘ин дифар улучІвубси
Дидин ранг чаъ жин апІуру.
Шуран маш уьру гъабхьубси
Дугъан улар гьитІикІуру.
Чаз теклиф апІурайиси
Сумчрарин йигьгариъ убчІвру.
Чан мичІли штухъ харгнайиси
Маниган гъянаъ штІум утІру.
Мархьари дагъ рабхурашра
Гъюру дидхъан сесер зангар.
Халкь хябяхърин абхурашра
Мугъаят вуйич нир ЦІангар.
Дав тярифар апІурашра
ЯкьинтІан ву думу бакар.
Баладар йиз бахт адаршра;
Ади ккуниз ич нир ЦІангар.
Ич Ляхла гъулан эйсиси
Аьхю швур тІапІна чан кьючІаъ.
ЛичІв гъарзар муртйирси сиси
Гъахура хирариан ДурчІаъ.
Ич нир ЦІангар, ич нир жангар!
Увуз чІуру гаф халис дар.
Ич нир жангар, ич нир ЦІангар!
Лап артухъ ишрияв цІадлар.
Ич нир ц ангар
© Copyright: Рашид Азизов 2, 2017
Свидетельство о публикации №117040301740
Свидетельство о публикации №117040301740
Рецензии