Хьадукран лишнар

ХЬАДУКРАН ЛИШНАР

КІван табшуругъариинди
БикІурайи шаираринси,
Табиаьтдинра кьудрат
Ихь дюн‘яйиъ кьадар айиб дар.
Дерднан гьиссариинди
Кагъзиин дахьрайи шиърарси,
Ккебгъру хьадукран сурат
Чан сирни ккагъри таза лишнар.

Зазси азабгурайи,
Турин хасият хъайи чрушан
Лишан вуйкІан хьадукран,
Йифун кІанккан кказабгурайи?
Бугъ абхъну абгурайи,
ВукІан ханкІриъ айи хутІлин лишан,
Йирфариъ ибтІнайи микІран
Гъабгъу мискин адабшвурайи?

Йиф убкъу цІийи йисхъан,
Мулухарин йигъар ккергъайиз
ЦІаси мани йигъари
Гюнйириин жан алапІуру.
Варжйир дутІну лисхъан
Уьру кьютІкьтІарстар ич дадайи,
Кьюрдун лизи йигъари
Фун кбибисру галар апІуру.

Гьадмуган хиял шулу
Хьадукран лишнар хъуркьна кІури;
Шак гъубзурдар, гюнйирик
Ччиларра карагънайиганна.
Магьа, гъи-закур, чІуру
ХанкІрин йирси йифар эрцІури,
Хьадукар дуфна кІури
Гьарай абхъна чІивишнаринна.

Ваъ, дурар дар хьадукран
Ухьу кІурайи лишнар багъри.
Я кьюрд гъубшиганра гъюру
Йигъахъ хътар дурар хусуси.
Думу вахтна хьадукран
Дишла уьмур ккебгъра дугъри:
Селер жаргъури кьалу,
Гав-гвар хъирчри ***иси гучІру.

Хьадукран жини лишнар,
Инсанарихьан уьбхюри сир
Чвлин ручI илми хутІлилан,
ЮкІв ттипну нежбрари хъапІрайи,
ДаркІан чпи ккергърайидар,
Ихь улхьан дурариз йивну ир,
ЧІиви табиаьтдилан
Аьмалдарвал алдабгъурайи?