Юрд, хъидип увхъан каламарин ккуртт

ЮРД, ХЪИДИП УВХЪАН КАЛАМАРИН ККУРТТ

Фурсар апІин, йиз дагълу юрд,
Яв кІван саб пай йиз мухрикк кка.
Узлан дизигна адлу юрт,
КІул‘ин мюгькам алди Бакка.

Йиз дагълу юрд, йиз баркаван,
Увухъ йиз дариз гьяйиф жан.
Ма, гъадабгъ, шулуш мадар, гьан.
Яв гъайгъу – метлеб вуйиз кІван.

Ккудушу гашлу вахтари,
Мяракйириъ машквраринси
Айва, эйси хътруб либцури,
Хил‘ан-хилиз гъябгъру тІулси.

Ккундарзуз фукІара сабан
Увуз ккимиди, яш хъапІуз.
Рази вуза лихуз кьюбан
Багълари дагълу юрд ккапІуз.

Гьамус хъавухъ Габан марцци,
АбцІу укІ айишваз хъаъру;
Кжакури яв канчІар дарцци
А увуз хилар гьачІаккну.

Габни кІуравуз Чахьна гъач.
Дугъу увхъанди жан дивна.
Гьаз хъаяв гъвалахъ иблис кач?!
Гьадди уву гьамци дебккна.

Дагълу юрд, гъяцІалдамива,
Улдубдну ппазйир–люкьяри.
Гьамусра ктубдурамива
Увуъ ичІигнайи мялхъвяри.

ГьачІаркк яв хилар Дугъахьна
Аку рякъ улупидивуз.
Дугъкан тІумтІарин шир духьна.
Яв багъдиз бегьер тувдивуз.

Юрд, хлинццариз гъюраяв зикв,
Ухьу уву тІирхуз гъитархьа.
ШейтІни гъюбгъю сагъ дапІну лик
Уву ялхъвниз адапІархьа.

Дюн‘я шадлувалиинди
Гьадгъахъ хъайидариз дубхьна.
Дюн‘я душманвалиинди
Думу нигь гъапІдариз дугъубжвна.